唔見咗一排嘅藍潔瑛前晚又出現，但就着住件浴袍踢住對拖鞋喺上水廣場對開路邊徘徊同煲煙，有街坊怕出事就報警，佢去咗上水警署之後，俾一男一女由警署接走。
藍潔瑛搭新界的士去到大學火車站再轉市區的士，大班記者追住影相，夜晚閃燈特別光，佢竟然可以碌大對眼一下都唔眨，而且一啲表情都冇。
藍潔瑛去到太子道西舊居落車，大廈看更開門畀佢時，佢忽然轉身話要去食嘢，看更就好唔耐煩咁鬧佢：「咁麻煩㗎，快啲入嚟啦。」有記者衝上前問：「藍小姐，你幾時返香港㗎？」藍潔瑛望都冇望係咁鬧：「都黐線㗎，我不嬲都喺香港㗎啦。」邊行邊入𨋢上樓。
曾權威幫少咗
今次藍潔瑛出事，全程唔見之前照顧開佢嘅緋聞律師男友曾權威，噚日曾權威喺電話度話藍潔瑛有個朋友Winnie住喺深圳，早排藍潔瑛冇交租，於是去咗Winnie度住，問曾權威仲有冇資助藍潔瑛，佢就話：「比以前照顧得少啲囉，過年前我都分兩次，每次畀咗5,000蚊佢，佢話我唔係佢杯茶嘛，又唔肯同我影相，佢都有打電話嚟求我幫佢交租。」問佢仲追唔追藍潔瑛？曾權威話：「唔追啦，杯茶都凍晒啦，追到佢嘅話，到時你哋要入女病房探佢，再入埋男病房探我呀。」
