「千金難買向南樓」呢句香港買樓格言，對於新一代嚟講可能比較陌生，不過，向南或東南嘅單位，真係特別受歡迎。《review33》上面有位網友Evian，親身講解向南樓嘅好處，「噚日去睇樓，向南嗰間真係好好風，而其他座向就冇風；光猛得嚟又唔曬，正！我之前嗰間屋向西北，夏天曬到阿媽都唔認得！」
原來好多網友都有類似體驗，好似isildur就話：「東、南、西、北加頂樓我都住過，向南總共住過港島及新界，發現向南樓真的冬天暖、夏天有風。」paultsui亦話：「我屋企向正南，頂樓夏天都唔覺熱、冬天又唔覺凍，仲好好陽光㖭。」
冬暖夏涼衰潮濕
不過，正如ikk話齋，「其實最好唔係向南，係向東南，向正南會暗小小，向東南就十全十美。」原來向南樓仲有另一特點，網友:-p話：「我屋企向正南，唔知點解打風嗰陣冇乜風？」Ed都係咁講：「我以前住港島，北向維港，打八號就大風到搖吓搖吓，啲冷氣機位成日有啲橫雨成功入侵。後尾搬咗去九龍，變咗向海南，早兩年夜晚掛九號、十號都唔覺大風，無搖到。」
當然，向南或者東南亦有缺點，好似oldkid話：「我住過向東南，近少少海，我覺得好潮濕，啲海風同南風吹晒入屋，櫃背、衣服好易發霉。」
之所以南向單位特別好環境，同香港嘅地理環境有好大關係，根據《維基百科》嘅資料，香港屬於海洋性副熱帶氣候，北半球冬季嘅時候，亞洲北部大陸聚集嘅冷空氣，令氣壓上升，形成吹向海洋嘅亁燥冬季季候風，而香港位處大陸南部沿岸，所以冬季風向多數偏北；至於夏季，南半球正值冬天，當地氣壓上升令空氣吹過太平洋，香港嘅夏季季候風大致偏南。