舊年股市當旺，好多人都諗過炒老細魷魚全職炒股，當然講係一回事，做又係另一回事，不過，若果你喺公司唔順意，反而股市就贏唔少，都可能有一刻衝動去全職炒股。
Jacky127就喺《公眾投資168綜合論壇》話：「份工冇前景又困身，多辦公室政治，做到冇心機，上年由5月到12月炒股賺嘅錢，等同份工全年總收入，個心十五、十六，唔知返工定全職炒股好。」
同社會脫節 投資大忌
對於呢個問題，絕大部份網友都唔贊成Jacky127全職炒股，Kaiserzhu提醒佢話：「97和00年有好多人都好似你咁想，仲實行埋，結果……股市花無百日紅，得閒欣賞一下1997年上實（363）、華創（291）等大紅籌下跌嘅驚人速度，你應該會作出明智的選擇。」
網友比錢話：「想全職炒股，我認為冇話好唔好，但要清楚當中利弊。第一，你一定唔可以期望每個月甚或每日有得贏，你條數一定係以年做單位。第二，你一定要有穩健經濟支持，例如有一千幾百個，齋做定期都夠食；或者好似我咁，有個米飯班主守龍門；又或者就算幾年冇做嘢，你都有一技傍身，可以隨時搵番嘢做。第三，對好多人嚟講，全職炒股會好悶，日日對住部機睇位睇盤、刨報紙，好少對人、同人合作，呢啲生活，唔係個個人性格都適合。」
正如人之初講：「唔返工，就會同社會脫節。自己感覺唔到個社會𠵱家發生緊乜事，走在眾人之後，係投資大忌。做人就要受氣㗎啦，連氣都受唔到嘅人，又點有福去承受財富呢！」
Jacky127都係諗清楚啲好。