萬家燒餅皇（a）
武漢燒餅皇$10/個
全港首創街頭中式燒餅，賣相十足Pizza，老闆親自到武漢學師整餅，之後再融入香港人的口味，以新鮮豬肉以及17種香料炮製而成，餅鬆香軟，中間的豬肉餡辣辣哋惹味嫩滑。每10分鐘就有新鮮出爐，就算排長龍都唔使等好耐，日賣至少400件。
日船章魚小丸子（b）
章魚小丸子$12/6粒
試過好多地方的燒八爪魚丸，唔係層皮太厚太多粉，就係粒八爪魚丁屎咁大粒仲要韌到飛起；呢度嘅章魚小丸子，外皮燒得脆卜卜，咬落章魚肉大大粒彈牙有鮮味，掃上燒汁、沙律醬和日本芥辣，配埋木魚碎，即使熱辣辣都忍唔住即刻食入口。開業超過6年，依然屹立不倒，人龍不時出現，高峯期日賣6,000粒。
肥媽小食店（c）
滷味魷魚鬚$5/串
呢度獨沽一味專賣滷味，老闆娘肥媽小時候跟阿爸賣牛雜起家，之後賣了40幾年滷味。
全店最好賣的是魷魚鬚，咬落唔韌好腍，肥媽話選用「沙腰鬚」，肉質夠腍，每日賣成40斤，一到放工時候定必人頭湧湧，真係切到手軟。
雞肫$5/串
薄薄的肫片，口感爽腍，以滷水浸超過1小時先夠晒入味，當然吃時再唧上最佳拍檔芥辣和甜醬，正！
哈文叔叔（d）
低脂曲奇$30/磅
全港獨家引入美國UncleHarmanCookies，所有曲奇以低糖低脂配方製造，共20多種口味，其中以果占餅、果仁酥和朱古力曲奇最好賣。
魷魚球$10/6粒
以新鮮魷魚混入生菜絲以及四種麵粉搓成魷魚球炸成，味道勁香口，皮脆有鮮魷魚味，老闆強調冇落味精，唔怪得食完都冇話特別口亁要灌水啦!
添記（e）
法式三文治（小）$16，（大）$30
開業超過25年，一直隱藏於毫不起眼的小街，靠口碑得以每日賣近百條的法式三文治。餡料以札肉、鹹豬手、五香腩肉等，塞入木棒形的法國麵包，放入焗爐幾分鐘，麵包焗至外脆內軟香恰到好處，之後再放入青瓜、番茄以及浸過甜酸醋的紅蘿蔔絲，令肉餡味道份外惹味。鍾意食辣的朋友可叫老闆加入指天椒粒，要幾辣有幾辣，不另收費。
捧場明星：
大曼谷（f）
糯米雞髀$13/隻
名副其實糯米雞，日賣200隻，雞髀肉以泰式香料醃製，然後釀入已炒香的糯米，放烤爐上用熱力將雞油肉汁逼出，滲入軟綿綿的糯米飯，雞皮金黃脆口，若嫌糯米飯唔夠味，可加多啲沙嗲或甜酸醬。
魚肉皮蛋$7/隻
拳頭咁大，魚肉以泰式香草和辣椒膏打成，包入原隻溏心皮蛋炸成。魚肉爽口帶點辣，好惹味，與皮蛋味好夾，日賣過百隻。
富豪雪糕車
富豪軟雪糕$6/杯
每次聽到雪糕車播出的《藍色多瑙河》音樂時，便會勾起小時候硬拉着爸爸買雪糕的情景。原來富豪雪糕在1969年開始出現，高峯期日賣至少千杯。不過自1978政府開始停發小販牌，令持流動小販牌的雪糕車隊不能再擴充，如今雪糕車只能維持14架之數。
珍寶豆漿（g） 豆腐花$3/碗
豆腐花好多地方都有得食，但於舖內磨豆即場撞就唔係間間咁做，冇防腐劑、入口鮮滑、豆香淡淡，雖則係基本要求，但已經冇乜人做到！如果你要問佢有幾滑，可以話你知「薄片」豆腐花完全滑到冇刀痕；建議食法係加黃糖粒，甜甜哋又有口感，屬傳統老智慧。
金銀島上海飽美食（h）
饅頭$2/個
拳頭咁大的饅頭，最高峯日賣2,000個。
菜肉包$2.5/個
若嫌饅頭味道太寡，不妨考慮吓菜肉包，冬天食一個，包保暖笠笠。
坤記士多（i）
芝麻糕$20/斤，最低消費$5
九層芝麻糕逐層蒸製，每日最多做4至5盤，手快有手慢無。
合益泰小食（j）
腸粉$1/條
嚟到深水埗，當然不得不提合益泰的腸粉，非常新鮮滑溜，據講一日賣近萬條，十分厲害，真係淨賣腸粉都夠晒皮啦！
明華餅家（k）
紅豆/奶黃燒餅$5/2件
一眼望晒、沒有絲毫裝潢的店舖內隨意放着一個個大鐵盤，盛着各樣包餅，唔靠包裝純粹以實力取勝。每日幾轉熱辣辣新鮮出爐的燒餅，餅皮軟熟煙韌，餡料唔太甜，試過買番屋企擺過夜都軟韌依然，值得一讚，難怪每次一出爐手快有手慢冇。
鴻發糕品（l）
鬆糕$3/塊
鬆糕可算是全店最好賣的，最高峯一日可賣過百底，最開心係老當益壯的老闆經常請人試食。
蘿蔔糕$2/件
剛出爐熱辣辣，足料蘿蔔，食落又唔粉。
艾草餅$3/件
呢款糕品出面少見，味道唔太甜，又有煙韌口感。
天喜素食（m）
沙律卷$10/4件
春卷皮內包着雜果沙律、青瓜、紅蘿蔔、薯仔等，即使炸過亦唔覺油膩；逢初一十五最少賣成50條。
甜酸齋$12/小、$16/中、$20/大
話明素食，梗唔少得齋喇！甜酸齋、咖喱齋、蠔油齋、齋叉燒、齋鴨肫任你拼。
紫心水晶餅$10/4件
店主經常創作，呢款紫心水晶餅推出唔夠1個月，最初以為餡料用紫米做，原來係紫番薯，再加埋透明水晶餅皮，賣相相當吸引。
生隆餅家（n）
發糕$3/個
咬落去口感鬆軟，唔會硬實實；日賣500個實屬等閒。
白糖糕$3/件
以前吃白糖糕，總覺有酸味，這兒的白糖糕味道清甜得剛剛好。
隨街搵食噏幾句
食店地址
（a）萬家燒餅皇 旺角登打士街43S9號舖
（b）日船章魚小丸子 旺角登打士街45A舖
（c）肥媽小食店 旺角登打士街4A
（d）哈文叔叔 旺角豉油街33號地舖
（e）添記 油麻地渡船角文苑街文耀樓30號A地下
（f）大曼谷 旺角通菜街39號A舖
（g）珍寶豆漿 土瓜灣馬頭角道9號C2舖
（h）金銀島上海飽美食 荔枝角道314號
（i）坤記士多 深水埗福華街115號
（j）合益泰小食 深水埗桂林街121號
（k）明華餅家 旺角煙廠街1至3號d舖
（l）鴻發糕品 深水埗基隆街251號
（m）天喜素食 深水埗北河街80號B舖
（n）生隆餅家 深水埗北河街68號