愛煞了劉德華，香港勝在有劉德華，劉華努力，人所共知，他努力為自己生命添姿采，也努力為港人爭光。
《門徒》中的劉華，又出現了一個新的層次，像小時候在電視上看見的太空喼廣告一樣──「跌撞唔爛，輕如冇嘢」，通常演員在電影中飾演毒梟一角都會出盡法寶，稜角分明，慌死戲中其他人及觀眾唔知，但劉華在《門徒》中嘗試舉重如輕，甚至是輕如冇嘢的演繹方法，大巧無工，摘葉飛花，又皆成利器。許多年青新人，一開始便覺得這類輕如冇嘢的演出很有型，爭住、搶住用這個方法演戲，結果不但輕如冇嘢，直情就係冇嘢，觀眾不癢也沒痛，記不起某某曾在某電影中出現過。舉重若輕要先經過舉重若重的階段，掌握了重才懂得追求輕，吃厭了濃味的蠻勁才會追求清淡的溫柔，演員是一個需要付出能量的行業，沒經過大開大合地發光發熱便想進入內斂的境界，等於拳腳未練好便修內功，只怕未能體會箇中真義亦冇咁着數。
香港也勝在有爾冬陞導演，能夠將以毒品作題材的電影拍出一抹夕陽的無奈感，將劉華飾演的「坤哥」塑造得有血有肉，尤其是描寫究竟坤哥有多有錢？究竟坤哥老婆（袁詠儀飾）是否知道老公販毒？寫得簡約精緻，吸引觀眾追看。
爾導演成功地將以毒品作題材的電影打入大陸市場，並得到很好的成績，堪稱一項示範作。要打進大陸市場，題材一定受到限制，但只要摸熟遊戲規則，不見得所有題材都是倔頭路，創作同業們共勉之。