鄉議局主席劉皇發喺年初二車公正誕到車公廟求籤，得第三十六中籤，籤云：「問君曾見舊時無，一醉昏迷為誰扶，正是今朝新樣出，無錢空手又來沽。」另外沙田鄉事委員會主席蔡根培求得第五十一中籤，籤云：「事業求謀且待時，若然動亂失原機，馬行千里須防倦，遠病年深不可醫。」
傳媒注意力集中於劉皇發之籤，因為佢夠代表性吖嘛，一啲報紙話呢枝籤幾好，寓意香港有新景象，團結續繁榮，即場負責解籤嘅師傅話以前未達成之願望，今年可以完成，本港可以有更好的發展。
只講好嘢為擦鞋，莫此為甚。睇嚟睇去，呢枝第三十六中籤唔算得好。譬如左丁山手上有一本《車公靈籤詳解》，編者係玄玄學會覺悟居士，就話第三十六籤：謀望暫不理想，求財半遂，事業守業勿動，搬遷不動為佳。風水丁財欠佳，學業保持成績，家宅安吉……等等。左丁山認為最弊係第四句：無錢空手又來沽，身上冇錢，竟然妙手空空去沽貨？此係人處於絕望時狠狠地玩一鋪嘅格局，輸死罷就，乃走向破產之道路。
年初三入馬場跑馬，見到中貿林帶住一條寫上「手空空無一物」嘅領呔，去七樓遴選會員廂房應酬。到咗第五場，佢走落幾層樓對左丁山講：「第四場隻九號馬是『美好威望』贏咗，呢場九號『美好祝福』應景噃。」左丁山半信半疑，認為「美好威望」係姚本輝馬房嘅，爆咗四十幾倍大冷門，應該博埋第五場四號「聚寶駒」啫。講得嚟，馬已入閘，中貿林飛撲埋投注機用智財卡落注，張卡插咗入去，重未過數，後面一位男士過於心急；竟然成叠飛插落去，於是jam機，中貿林竟然因此買唔到飛，嬲到面紅耳熱，因為第六場就係跑出「美好祝福」win，與「聚寶駒」串Ｑ，派千三蚊。中貿林本來下注二千蚊獨贏位置，一百蚊連贏與位置Ｑ，總共可收到四萬六千，點知畀一位好冇禮貌嘅馬迷阻頭阻勢，見財化水，應咗「手空空無一物」之句，㷫到彈起。年初三跑馬旺九，九號馬連場爆冷，十場之中，七場有九號入三甲，九檔馬亦有三場入前三名，唔到你唔信邪。