隨着樓市向好，上季本港負資產數目已經降至8444宗，達近年新低，對比03年6月底高峯期超過10.6萬宗，累積減少92%，反映不少樓蟹已經鬆綁。
居於屯門華都花園嘅Joe媽媽，卻不幸仍然係少數負資產個案之一，佢97年用210萬元買入嘅單位，𠵱家市值得70萬元，Joe媽媽仲欠銀行90萬按揭。眼見過去幾年樓價逐步反彈，唔少業主已經走出困局，偏偏自己層樓依然冇乜起色，仲問《親子王國》嘅網友，究竟係咪應該做個了斷？
講起呢個話題，唔少網友有切膚之痛，None_None、Mrssslui建議佢撐落去，Mrssslui話︰「有冇一筆錢擺落去呀？唔供又可以點呢？賣出蝕好多！惟有望樓市上升令你快啲到家鄉！」
不過，YB就勸Joe媽媽有得走好走，「我97年買屯門寶怡花園，590呎，240萬，供咗近10年都仲係負資產，終於舊年補廿幾萬甩咗，𠵱家租4000蚊一個月，包差餉管理費，簡直快活過神仙。如果我再早啲壯士斷臂，𠵱家都儲番過百萬嘞。」
升少少快啲走
網友支支亦認同︰「有得走好走，香港經濟（樓市）好難會再好似97嘞，我哋呢輩試過咁嘅經歷，相信對樓市已經冇晒信心。如果香港經濟（樓市）好似97咁高，相信都係我哋下一代嘅事（我見過鬼所以怕黑），如果我再買樓，我會夠錢先買，唔會再同銀行借。」
記者就Joe媽媽嘅處境問過地產界朋友，得出結論係應該賣樓，但唔係呢一刻，可以睇埋下半年。佢話Joe媽媽個單位想重返買入價，係百分百冇可能；唯一就係等今年樓價再升些少，盡快沽出，減低抬錢贖樓嘅成本。
雖然市場普遍認為中小型住宅樓價今年將有10至15%升幅，但地產朋友好老實咁話，升浪係視乎地區而定，屯門、天水圍區嘅樓價未必可以有好大漲幅，所以提醒Joe媽媽，只可以蝕少幾萬做目標，切勿抱太大期望。