不笑或微笑的謝天華，寸過碼頭咕喱。他在《女人唔易做》飾演賤Man文景良，入型入格，女人見他會愛恨交集，想摸他的面一把，然後摑一巴。現實中，謝天華愛蒲又愛玩，也是有點壞又有點乖，跟他同行人生路的李天恩（Tina），對這個壞男人就像放風箏一樣，牽線時緊時鬆，那樣他便曉得乖乖回來。
夜蒲收風
前年，謝天華娶了Tina。婚後他照蒲照玩，繼續樂逍遙，他笑說：「人冇完美，所有人都有缺點，我缺點太多。絕對好男人，我唔會諗，標榜係好男人，做錯少少嘢，會被人話『呃我嘅』？寧願做個衰男人、壞男人，做少少好嘢，就話其實都唔係好衰啫、都唔係咁壞，exactly係賤Man咁。我係有同朋友出嚟蒲，都蒲少咗啦，以前係為蒲而蒲，𠵱家蒲係想update資料，睇吓出嚟蒲嘅人，講緊乜嘢話題，拍嘢用啫。」
由於謝天華沒有緋聞，touchwood，所以Tina肯放老公去威，對他是很放心的，謝天華說：「佢知男人要出去飲嘢減吓壓，困個男人喺屋企做乜？困住會冇事咩？識諗嘅女人，會畀男人relax吓，臨出門口前仲要同佢講『你玩得開心啲』，老公就會自自然然返屋企，喺電話度大吵大鬧，男人反而怕嗌交，係要蒲到天光至返。」
抗拒誘惑
蒲，會有誘惑。夜場出現形形色色的美女，問謝天華有沒有飛來蜢？「話冇，呃你。」他說有，但超快補充：「睇誘惑大唔大，但未遇到好大囉，哈哈！Ending都係飲到咁上下，係時候返屋企，唔會再流連，我有冇緋聞吖？自律㗎。」很多女人向男人施展經濟封鎖，對方冇蚊就冇得滾，謝天華不知多得戚說：「唔work㗎，我哋兩個經濟獨立，經濟封鎖係以前粵語片嘅橋，如果出蠱惑你都唔知啦，佢冇咁嘅要求，我係唔識理財，但唔係大花筒，每個月畀家用，再畀屋租，其他嘅就儲起嚟。
「其實結咗婚之後，整體上比較上軌道，之前做嘢飄來飄去，已婚男士有家庭責任，比較穩定，有好多人話對得耐感情淡，我覺得只要事無大小、雞毛蒜皮都同佢講，感情就會好。有啲人犯咗好大錯誤，結婚好多年，老夫老妻，你都知我諗乜，大家心照，咁就出事啦！真係唔知你諗乜喎，邊有咁多次心有靈犀吖？好多問題就係咁走出嚟。男人比較貪玩，越係被綁住越唔鍾意，反而唔好鍊咁緊、放鬆啲，佢自自然然唔會太過份。」