劉美娟05年為丈夫張崇德誕下男嬰，可惜出世不夠一日便夭折，令他們大受打擊。事隔兩年，張崇德和劉美娟終走出陰霾，劉美娟更在年廿八（15日）誕下8磅2安士男嬰，雖然BB一度因呼吸困難及肺部有水而被送往深切治療部，令二人擔心到晚晚失眠，幸經過醫護人員悉心照料後，BB終在前日年初六康復出院，一家三口在新春佳節慶團圓。
現年38歲的劉美娟和34歲的張崇德在01年結婚後，於05年2月誕下愛子天藍，豈料小生命出世不夠一日便夭折，令夫婦二人傷心欲絕，劉美娟更曾表示以後不敢再生育。但隨着時間過去，他們終走過陰霾，去年12月，張崇德演出《勁歌金曲》時，喜孜孜地宣布太太再次有身孕的喜訊。
爸爸直擊剖腹產子
本報昨日接獲消息，指劉美娟已於日前順利誕下男嬰，記者遂致電張崇德，他難掩興奮心情說：「係呀！BB喺年廿八上午9點幾出世，由於過咗立春，所以生肖屬豬仔，BB重8磅2安士。我太太係開刀生嘅，我哋揀嗰日開刀係因為好多內地孕婦嚟香港生BB，好難book日子，加上過年醫生放假，所以先至揀年廿八生。」
張崇德表示還未為BB改名，而他太太開刀產子時，他也在場為太太打氣，以及用攝錄機拍下生產過程，他說：「BB一出嚟就好大聲喊（天藍出世時沒有喊聲），嗰一刻心情真係好激動。不過BB出世後，醫生話佢個肺有啲水，呼吸唔係咁好，所以即刻安排BB入ICU（深切治療部），我同太太都好擔心，即刻諗番起兩年前個仔件事，擔心到晚晚冇覺好瞓。不過，醫生話好多BB都有咁嘅情況，叫我哋唔使太過擔心。」
抱BB一刻最感動
張崇德表示，劉美娟於年初二出院，BB則於前日年初六出院，他與太太獲悉BB沒有大礙後，不禁鬆一口氣，張崇德說：「BB出世之後，爺爺嫲嫲都未有機會見過BB，所以噚日（前日）爺爺嫲嫲、我哥哥同我成家人一齊接佢出院。噚日係我最開心一日，開頭我都幾唔忍心擺BB喺ICU，因為太太開刀做完手術後傷口未埋，初初幾日只得我可以入去睇BB，但睇嗰陣都唔掂得住，所以噚日抱住佢出院嗰一刻，真係好感動好開心。」
張崇德與劉美娟的愛情結晶品胖嘟嘟，十分可愛，臉蛋跟母親有幾分相似，但張崇德卻笑說：「BB個嘴有啲似我，頭髮就似媽咪。」未知BB會否承繼埋父母的音樂細胞和演戲天份，將來在演藝界大展拳腳？
採訪：戴彩煥
