古巨基白毛波鞋
「呢對毛毛波鞋係去日本旅行時買嘅，我第一眼見到，已經決定買嚟留番新年着，因為我覺得呢個款好應節。我本身好鍾意買啲款式比較特別嘅波鞋，加上對鞋嘅價錢又唔貴，容易襯衫。」
鄧穎芝原創飾物
「呢個牌子係本地原創，係一班本地設計師嘅作品，然後將製成品外銷到日本等地。今次我戴緊呢個LiBiDo系列，係專for女仔嘅，飾物本身設計比較誇張，重金屬味，迎合嚟緊大熱嘅hiphop潮流，同埋我覺得好適合我哋喺台上演出時佩戴，可以突出視覺效果，平時戴又可以展示個人品味。」
王浩信應節紅褸
「呢件皮褸香港冇嘅，係喺日本買，我好鍾意個款，仲一次過買咗兩件，一件黑色，一件紅色。呢件紅色就係買嚟應節，新年紅彤彤，好意頭嘛！平時我都好鍾意着Y3啲衫，因為佢個cutting真係好好，佢每件衫嘅駁位都會加塊有彈性嘅布，好似我之前買件西裝，用嚟跳舞同做運動，都一樣活動自如，真係價錢幾貴都物有所值。」
薛凱琪友情頸箍
「呢條類似頸箍嘅頸鏈係朋友送畀我，已經係幾年前嘅禮物，𠵱家再戴都唔覺好out，仲好襯我件衫，其實呢種頸箍鏈我唔係成日戴，不過呢條就好襟戴，雖然有水晶同鐵絲喺條鏈上面，但我一啲都唔覺得辛苦，自己平日戴飾物最主要都係睇心情，有mood就會戴啲特別啲嘅款，冇mood就寧願唔戴囉，不過我戴得最多都係一啲比較幼身嘅銀頸鏈。」
採訪、攝影：李珮洳、駱華齡、楊潔雯、馬建華
