歌仔有得唱「人生如賭博，贏輸都冇時定。」的確，人生常要面對各種賭博，有說婚姻是賭博，事業也是賭博，選擇pass抑或晒冷，要睇你膽識和彩數。
在娛樂圈打滾13年的謝天華，三年賭兩鋪。前年結婚做老襯，今年在賀歲劇《迎妻接福》中孭重飛做男主角，「賤Man」披清裝化身「爛賭義」，賭到錢又冇、老婆又走佬，但會不會像去年《女人唔易做》般一賤定江山？還需拭目以待。
不管謝天華能否贏多鋪，但壞男人確已成為他的icon，「男人唔壞，女人唔愛」他邪邪笑說。既然他在螢光幕上又壞得幾好睇，就請他繼續壞下去吧…… 撰文：朱倬誼
事業篇 殘忍名利場
謝天華說：「入娛樂圈係一場賭博，冇人話畀你聽一定贏，又未必一定輸，好多人入娛樂圈，20年後先至紅，有人一入即紅，但紅一陣又消失，好似流星咁過咗，娛樂圈係好玩嘅地方，又係好殘忍嘅地方，因為唔知幸運之神幾時嚟、幾時走。」
風火海窮到燶
撈足13年，時至今日，謝天華在賀歲劇《迎妻接福》中孭飛，飾演爛賭義角色，說穿了就是清裝版賤Man。去年他憑《女人唔易做》成為台慶男主角黑馬，不知他有沒有信心憑爛賭義坐上劇帝寶座？謝天華說：「今次做男主角，會用平常心睇呢件事，我用盡全力拍，但出到嚟係點，年年形勢唔同，每年都有好多變數。攞獎嘅嘢，個個入行都有少少貪念，唔代表係衰嘢，反而令人更加進步，我想有更大發揮，唔想一步登天，隻腳冇咁長，逐步行仲好。」
謝天華的出身，跟你我一樣，小時居於秀茂坪屋邨，9兄弟姊妹，他排第8。畢業後考入無綫當舞蹈員，後來被前經理人許愿發掘，安排他跟陳小春、朱永棠合組風火海，此後其星途經歷一跌三起，最霉時，試過得5蚊身家。
「算好彩啦，經歷過嘅每件事，我心態都係enjoy，每樣嘢梗有成功有唔成功。風火海出道時太新，啲人唔敢搵你做嘢，自己有約在身，唔可以個別接job，最低潮係呢段時間。我試過掃勻成間屋同成架車，得5蚊，真係谷底位，好down，仲諗自己係咪應該結束娛樂圈嘅事業，好彩即刻接到《古惑仔》，之後星途都幾暢順。」
笑小春最孤寒
《古》片系列讓謝天華初嘗成功滋味，飾演「大天二」的他憶述說：「嗰時我係新人，拍到咁hit嘅電影好lucky，套戲係卜一聲爆出嚟，即晚就接到老闆電話搞慶功、開續集，自己嘅收入都開始好，可以還完人生第一筆債，就係爭經理人公司嘅六位數字。之後到《雪狼湖》，啓發到我演出時嘅技巧，多謝張生（張學友）畀呢個chance我。跟住係賤Man，好多觀眾識得謝天華都係因為呢套劇，嗰期出街，真係好多女士望㗎，男人越壞、女人越愛啩，哈哈。」
事業有起有跌，但最難得的是，風火海長存，三個大男人依然情不變，謝天華笑謂：「我哋冇乜點變，係大個咗、成熟咗。啲人唔識阿春，會覺得佢古怪，熟佢脾性就覺得佢幾好笑，同埋孤寒少少囉，食完嘢要AA制，佢話『做乜要我請呀？你唔識賺錢咩？』，𠵱家佢個人定啲，蒲就大家都有蒲，會出嚟傾吓偈。朱永棠結咗婚有個女，轉行做生意，但仍然咁貪靚，次次出嚟都精心打扮過，亁亁淨淨好整齊。」
