如果你係Mercedes-Benz嘅Fans，唔使講都知道佢哋旗下嗰款Unimog，絕對係一款正宗嘅多功能車，佢除咗係一部貨車之外，仲可以變身成消防車、鐵路工程車，隨時連幫你耕田都NoProblem；或者因為咁，而令到佢喺最近一項越野車頒獎禮中，喺特別車款類別中勝出。
記者：鄭達基
攞獎靠特殊功能
由《OffRoad》雜誌超過56,000名讀者，喺80款不同型號嘅車款中，投票選舉出嚟嘅2007年度最佳越野車，查實係分成8個組別，包括越野車、豪華越野車、SUV、豪華SUV、古典車款、Pick-up、特別車款及Crossover車款。其中喺特別車款一欄中，入選嘅車輛必須具備越野功能之外，仲要可以用嚟運載貨物，又或者係備有特別車身結構，可以用嚟改裝成如消防車呢類特別用途車輛。
救火拖火車都得
正如我頭先咁講，Unimog可以隨時變身，不但可以將佢當作一部普通嘅貨車用嚟運貨，仲可以加裝額外配備，變身成消防車去救火，又或者變成鐵路工程車，走去幫手拖走壞咗嘅火車，而且佢仲備有越野功能，攀山涉水無問題之外，仲可以走去爬樓梯㖭！有齊咁多Function，唔怪得可以三度獲得最佳越野車車輛中嘅特別車款獎項啦！巴閉巴閉！
