今天，要吸引觀眾走進戲院欣賞電影，除故事跟演員陣容要有一定吸引力外，片中的官能刺激更是不可或缺，不論是爆炸、動作還是飛車場面，絕對是越多越好。羅禮賢（Bruce），堪稱本港電影界中首屈一指的特技王，多年來參與的電影多不勝數，而最能令人留有深刻印象的，就是1995年夥拍劉德華的《烈火戰車》，當上飛車指導的同時也擔當演員一職，在大銀幕上跟觀眾見面。或許，你會覺得他常常拍攝飛車場面，在現實生活中選擇座駕，也要高性能的一款，但實情卻剛好相反，安全第一是重要考慮因素外，飛車情景亦只限於電影片段裏！
文：TigerL 攝影：譚盈傑
安全是首要條件
不同人在揀選哪款汽車當座駕的課題上，總有着不同的答案，慳儉的人會揀售價相宜的，花得起的總愛名牌，追求速度則會揀選性能表現強的一款；可是，因工作需要而經常接觸不同車輛的羅禮賢（Bruce），在他的揀車哲學裏，原來有着另一種想法，「其實車對我嚟講，有四個轆識行識走就已經足夠；亦都可能因工作關係，有時去到拍攝現場，導演話想要點樣點樣，然後就畀部車你試，根本無時間準備就要即刻跳上車，試吓部車嘅基本性能，然後做出導演嘅要求，例如要點樣翻車，又或者係點樣撞車嚟配合劇情。就係咁日子耐咗，令自己對車嘅要求就嚟得比較簡單，亦都可以話係因為好多車款都試過，所以覺得大部份車款其實都係不外如是。」
無錯，對一位身經百戰的汽車特技人來說，再好或是再差的車也試過，對汽車的要求當然跟一般用家會有很大差別；話雖如此，Bruce在現實生活中，揀選汽車時還有一個特別要求，就是襟撞！「喺我嘅角度，車係要嚟撞吓，喺道路上有乜嘢車係未撞過，無論大炒或者小撞，如果架車襟撞（即係鋼水好），其實代表咗部車有好高嘅安全性。另一個Point就係要馬力夠大，因為若果遇上一啲突發事故，要突然加速嚟避免意外發生的話，馬力細嘅車款就會處於被動狀態，會好蝕底。」
載得人多方便接Job
身形龐大、載客量高、馬力充沛，就是MitsubishiDelicaSpaceGear的特性，實難怪Bruce會以它作座駕，「我揀DelicaSpaceGear嘅主要原因係為咗方便工作，有時有啲Job要成Team人一齊開工，座位多可以方便一齊出發，仲有當需要大量道具嚟配合拍攝時，佢就可以當一部道具車用。而佢嗰台3.0公升引擎，仲好好力㖭！」
另外，原來他也很喜歡為座駕DIY一番，「因為我經常要做一啲危險嘅特技動作，所以安全係我首要考慮嘅因素。亦都因為咁，我會主動改良一啲未夠完善嘅道具，務求可配合工作需要。」
世上無難事只怕有心人
老實說，DelicaSpaceGear跟Bruce的性格實在有點相似：前者廠方為令車款變得盡善盡美，在這些年來不停作出改良；後者則要為拍攝的電影變得完美，絕不馬虎了事的同時，也會設法把動作做好。
當小記問Bruce到這一刻為止，有沒有一些事情是想做還未做時，他很認真地想了片刻，「無！世上無難事，可能我鍾意坐言起行，好似要整一件道具出嚟咁，開頭梗係有好多Idea，咁咪試吓囉，唔試過梗唔知㗎，唔得咪整到得。到最後若果真係唔得，就證明唔Work，咁咪整第二樣囉，但係試都未試就話唔得，咪注定失敗！其實只要有心做事，好多問題都可以迎刃而解。」他的答案正好反映出「世上無難事，只怕有心人」的道理，小記亦相信Bruce，能在電影界佔一重要席位，絕非一時三刻能做到，而這種鍥而不捨的性格，絕對是時下年輕人值得借鏡的最佳例子。
電影飛車全靠羅禮賢
行貨名字是SuperExceed
90年代初興起的一股MPV熱潮，MitsubishiSuperExceed正是當年的熱賣車款之一。或者你會問，為何SuperExceed跟Delica的賣相會如此相近，查實SuperExceed根本就是Delica車系中的一員，而且是由代理引入的版本，所用的引擎是2.4公升型號（馬力132匹），而由水貨車行引入的則是頂級3.0V6型號，兼配備4驅系統。此外，車廂布局可有9種不同變化，以迎合不同需要。新一代版本亦已於早前推出，內外也用上新設計之餘，並被定名為DelicaD:5。
MitsubishiDelicaSpaceGear3.0規格
引擎：3,000c.c.V6SOHC
馬力：185ps/5,500rpm
扭力：27.0kgm/4,500rpm
傳動：4前速自動波
當年新車價：約$500,000
現時二手價：約$50,000起