話玖龍紙業（2689）係「狗年股市之星」，相信冇乜人會反對，至少佢嘅股東會舉腳支持，散戶對這隻股嘅熱愛程度，幾乎時時刻刻都諗起佢，網民JOJObaby2888喺農曆新年睇賀歲片《門徒》就聯想起愛股玖紙，佢喺《香港討論區》話，戲入面飾演警察嘅主角吳彥祖，警察編號係UI-2689，咪就係玖紙嘅股票編號囉！咪以為得佢一個咁無聊，討論區上原來好多網友都留意到呢點。
話唔定中六合彩
Heidiyeah話：「睇套戲嗰時都留意咗好耐，不過由於無戴眼鏡，有時睇落似2689、有時似2389。」csmmmc仲斷言：「拍呢套戲嘅導演（爾冬陞）應該有貨喺手！」warlan就好理智咁話，兩者根本無任何關係；eviling2002話：「咁都諗到，不如將4個冧巴嘅組合2、6、8、9、26、28、29，拎去買六合彩啦。」
網友唔單止聯想到股票咁簡單，網友估股下仲問：「《門徒》嘅啓示即係代表要買貨定沽貨先？吳喺戲中又係做差人，不過今次差啲變道友喎。」瀝古瀝古就認為睇戲都聯想到股市，莫非係股災最新先兆？
舊年3月以3.4元招股的玖龍紙業，上市近一年升勢未停過，上周五收報16.12元，不足一年急升超過3.7倍，又難怪令網民時刻都想起。
