一年一度馬拉松盛事喺下個禮拜日（3月4日）舉行，贊助商渣打噚日特意喺維園搞咗個嘉年華會，畀參賽者攞參賽制服，及舉行有關長跑知識嘅講座，費事好似上年咁有咁多人不適，當然亦宣傳吓存款產品。
渣打香港個人銀行業務主管洪丕正介紹，今屆馬拉松參與人數再破歷年紀錄，達4.3萬人，去年有約4萬人，已成為全球馬拉松賽事中，最多人參加嘅第3位，緊次於柏林同倫敦，前兩者參與人數亦唔多過5萬人。
為咗應付人潮，今次賽事要分5場起步（上年得4場）；最早一場賽事喺晨早5點半就起步，邊個肯咁早主持開槍？係香港業餘田徑總會會長毛浩輯，其餘依次係渣打英國總公司請嚟嘅貴賓GuyDawson、香港呢邊嘅執行董事兼行政總裁蘇利民同主席周松崗，現任特首兼會參選下一任嘅曾蔭權就負責最後一場。
[email protected]