玖源（8042）係最平嘅扶農及化肥股，股價又貼近大圓底頸線前，等爆。玖源06年度頭9個月，因為遇到四川百年不遇大旱，純利輕輕倒退8%到3510萬銀（人民幣．下同）。但天災人禍講唔埋，屬非戰之罪。
再講，玖源呢期加強外銷，又為產品合成銨進行技術重建。據估計，單係呢壇製作，成本節省達到1200萬銀。以05年度純利4700萬銀做基準，成本減省變相為純利增加高達25%。
就當玖源06年度純利無增長，維持4700萬銀，PE都係講緊7倍。隨住氣候回復正常，加埋技術重建經濟效益浮現，07年度業績會好爆炸，估計純利增長40%到6600萬銀，PE得番5倍。龍頭化肥股中化（297）未來兩年預期PE27倍及22倍，玖源平得過份。又就當炒落後，博玖源上試圓底目標0.96元，潛在升幅都講緊43%。信玖源07年度好景，博現價翻一番到1.34元，到時PE不過10倍。
亞鋯成交先嚟料
亞鋯（395）上星期五成交大增到3500萬股，但只係升3%，成交先嚟料，又係等爆升格局。亞鋯主打稀有金屬「鋯」化合物業務，場內亦都只此一家。呢期國際商品價反彈，亞鋯已經有point炒上。
再講，亞鋯有業績墊底，07年度預期PE都係講緊6字頭，P/B不過1倍多少少，商品、金屬類別當中，又係平通街。係咁易以亞鋯07年度10倍PE做目標，現價要翻半番見1.5元。