介紹汽車漫畫，又點可以唔講吓《頭文字D》呢？佢最吸引人嘅地方，當然係主角拓海點樣用佢神乎奇技嘅技術，揸住架ToyotaAE86都可以跑贏一眾大馬力勁車嘅故事，因而令作品熱賣，漫畫總銷量至今接近4千萬本！之但係咁，讀者不難發覺近幾期嘅劇情開始單薄，欠缺一啲精采橋段，而且出版日期越拖越長，究竟係咪作者江郎才盡呢？
但無論如何，我始終覺得《頭》仲有一個後着，呢個就係拓海老竇—藤原文太，喺好多讀者心目中，文太先係真正車神；咁耐以嚟，文太從未輸過，即使拓海點勁都好，對住佢永遠係三扒兩撥就被打低，而且咁多集以嚟，文太身份都保持極度神秘，好多讀者都渴望知道佢嘅過去，喺電子遊戲裏面，文太更永遠係至勁嘅隱藏人物，可想而知佢嘅崇高地位。好話唔好聽，假如漫畫銷路一跌，只要作者使出文太呢個撒手鐧，肯定銷量會反彈飆升，兼且再破最高銷量紀綠。
記者：之達