花旗股市上禮拜五下跌，道指已經連跌3日，油價上番61美元，金價係咁升，其他金屬價格都上番好多，好容易俾人聯想到通脹來臨，美股會唔會大幅碌落嚟呢？投資者就算未到擔心嘅地步，相信都開始有啲關注。
睇番圖表，期油反彈咗咁多，其實都只係高位跌落嚟嘅跌幅嘅1/3，𠵱家企喺阻力水平，62美元同64元係短線阻力位，68美元係關鍵阻力位，係好淡分水嶺，油價跌番落58美元樓下，啲人嘅睇法又會好唔同。
金價炒得好急，技術已經破咗位，短線個勢睇好啲，其他金屬價格都炒上，睇個款，唔似炒通脹升，「通脹升」只係藉口，錢係推高資產價格嘅最重要因素，呢幾年金融市場俾對沖基金玩晒，啲錢大舉湧入掃高，點會唔升，睇金價都係以圖表做參考好啲。
伯南克已經講得好清楚，通脹仲會落，佢擔心嘅應該係美國樓市會唔會拖垮經濟，而唔係通脹，滙控（005）喺美國嘅按揭業務有咁多壞賬，其他銀行會點，大家都心中有數，伯南克點會唔驚，如果跟住落嚟美國啲銀行公布嘅業績都顯示樓市唔掂，伯南克隨時會搵個藉口減息救經濟，或者至少市場可以用呢個藉口炒。
和黃P輪7848：和黃（013）上禮拜五收78.55元，跌穿50日線，成交雖唔算增加好多，但幅圖就好曳，如77元守唔住，就要試75元，最近嘅「好消息」，基金唔當好消息，股價俾人掟，睇嚟仲有沽壓。可以吼吓和黃P輪7848，上禮拜五收52仙，槓桿率15.1倍（有效6.9倍），對沖值0.45，正股下試77元，7848會升到60仙，正股跌到75元，隻輪會見70仙，正股升破80元止蝕。