前晚場馬德里打吡戰，戰果係人都知，但如果當晚無捱夜就一定錯過臨尾段小插曲。話說皇馬守將沙加度同對方嘅米斯達爭頂後整親個肚，落地後嗌晒救命，而個身又伸唔直；當佢嚟個「彭丹拱橋」，米斯達二話不說撲落地「捐窿」幫佢頂住條腰，到軍醫出嚟，米斯達至功成身退。雖然係打吡戰，但米斯達咁有體育精神真係抵讚。