死喇，外表斯文嘅巴塞隆拿中場廸高，俾英國傳媒爆踢背妻偷食，呢鑊肯定一身蟻喇！3個禮拜前，隨葡萄牙到倫敦同巴西「拍跳」嘅廸高，可能寂寞難耐，去咗夜店搵件1,000鎊（約15,000港元）一晚嘅高級妓女歡樂歡樂，完全忘記屋企個老婆同3個仔女。
本來代表葡萄牙出戰巴西係一大榮譽，但今年29歲嘅廸高正值壯年，一條佬去到夜生活多采多姿嘅倫敦，卒之受唔住誘惑，同埋抑制唔到內心嗰把「火」，贏咗巴西2:0後，佢就約埋7個「同道」中人一齊去夜店耍樂；據講，佢哋一共order咗4件惹火女郎坐枱，分別有北姑、紅髮同金髮囡囡，真係「款式」齊備，要乜有乜！
沙發梳乎20分鐘
廸高飲咗一陣酒，就開始埋牙，喺沙發玩咗20分鐘後，嫌唔多夠喉，又叫多個囡囡嚟玩「一王兩后」出「火」，而班朋友就喺隔籬大玩「派對」，有知情者仲加把口：「佢哋成班禽獸一樣，旁若無人。」好衰唔衰，歡樂過程俾該夜店嘅閉路電視拍低晒，𠵱家英國傳媒梗係唱到街知巷聞，睇嚟，廸高呢鑊都有排煩喇！