年初三跑馬，第五場中貿林中完空寶，立即與老婆周圍行，直至第十場先至再出現，呢次坐定定，望住電算機到最後兩分鐘，見到五號馬「步步穩」落飛如狂，撲埋去買獨贏位置，呢次再冇麻甩馬迷搞亂檔，投注順利。左丁山認為二號大熱門「夢幻飛駒」贏面最高，一於唔肯跟風，但因為九號馬太旺，於是補到一條二號搭九號，唉吔哋，中貿林卒之係夠運啲，五號贏，二號輸，但幾十倍嘅九號「五穀豐收」竟然又跑入大冷腳，唔到你唔服。中貿林笑騎騎收錢離場，左丁山畀隻「夢幻飛駒」斷晒啲過關獨贏與六環彩，變成手空空，贏錢原來係夢幻，做人係要步步為營，穩打穩紮好啲。
返到屋企，再睇番劉皇發枝車公第三十六籤，睇落唔多掂，但唔知點解。手機響起，八卦邱來電：「喂，我喺街上聽見一位師奶讀枝籤，佢大概唔多識字，講得好好笑。不妨轉述：嗱……」
街上師奶讀籤係咁嘅：問君曾（讀曾蔭權嗰曾，不讀層）見舊時無，即係話曾先生舊陣時無財無勢；一醉昏迷誰為扶，如果一朝發達歡喜得滯，飲大兩杯，邊個去扶佢起身呀？正是今朝（讀潮，不讀焦）新樣出，今朝大權在握，猛咁出新花樣，新招數；無錢空手又來沽，猛咁沽空博懵，開空頭支票，因住呀！
左丁山輸咗錢本來為之悶悶不樂，聽完八卦邱轉述街頭師奶解籤，為之笑到碌地，覺得啲街頭智慧又幾幽默噃，將「問君曾」變成問曾君（曾先生），乃神來之筆，對曾先生有警惕作用，請曾先生再度當選後，喺新朝代唔好搞太多新花樣（如大派社會福利，公平競爭法，最低工資法），搞到香港「無錢空手又來沽」。唔好話師奶夾硬嚟噃，大家可否記得，○五年劉皇發求得車公第十三籤：「持齋受戒須精致，盛積爐煙薦聖賢，香火滿堂皆顯應，何勞經卷往西天。」當時夠有高人解釋，持齋受戒者，僧人也，即曾先生也，不須勞煩唐三藏（唐先生也）去取經，故此新特首會係曾先生咯！