太古地產喺灣仔嘅太古廣場第三座，距離灣仔同金鐘地鐵站有一段路，總之係好天曬落雨淋啦。不過，太古成功爭取到起行人隧道接駁太古廣場第一、二期同金鐘地鐵站，條隧道今日正式啓用，以後太古廣場第三座嘅租戶去金鐘地鐵站就方便得多。
出小財入大財
呢條行人隧道係太古自己畀錢起嘅，睇落好似好蝕底，但實情太古先至係大贏家，因為條隧道接駁嘅太古廣場一同二期，咪又係太古持有！咁可以將以前四圍散出去搵食嘅太古廣場第三座租客吸埋過嚟，「肥水不流別人田」，除咗太古廣場食肆旺之外，亦會帶旺埋商場零售消費，咁太古嘅租金收入咪「水漲船高」囉。
另外，既然太古廣場第三座冇咁隔涉，將來寫字樓續約，租金又可以加多啲；同時，太古地產喺太古廣場第三座附近揸住嘅舊樓，第日重建又值錢啲。呢啲就係所謂「小財唔出，大財唔入」，明白未。
[email protected]