經過股市風起雲湧嘅一年，新正頭網友manchai突然間喺《公眾投資168綜合論壇》上面，用成千字探討一個「發人深省」嘅課題──炒股到底是為甚麼？佢話：「炒股不應該是為了賺錢，其實炒股的真正目的應該是磨煉自己。」
我炒故我在
對於呢個咁理性嘅話題，網友亦熱烈回應，好似cheese就「引經據典」話：「其實唔同嘅學派有唔同嘅領會同見解，最前衞嘅有法國哲學家宙（應該是「笛」）卡兒，佢對人生意義有好深刻嘅反省，佢嘅反省總結同名句：『我想（應該是「思」）故我在』；到咗19世紀投資盛行，新學派異軍突起，再由各散戶發揚光大，成為：『我炒故我在』。」
就算唔用咁學術嘅角度討論呢個話題，散戶炒股亦有其他目的，好似Ray話齋：「炒股主要目的係畀啲錢銀行賺吓，增加政府庫房收益，製造多啲就業機會，希望人人有工開，促進社會繁榮穩定，實現一國兩制和諧發展，訓練判斷能力，抑制情緒……」
網友k就話：「啲親朋知道我有買股票，見面經常都同我講股，講股好過講是非。」
不過，講嚟講去，大部份人花精神研究股票，真金白銀下注，最終目的應該同網友人之初一樣──「我炒股最初為咗搵銀，𠵱家又想搵銀，又可解悶。」