每日收市後港交所都會披露上市公司股權變動，只要涉及持股逾5%之上市公司股份買賣，或涉及董事身份買賣股份都會出現，呢啲大戶手影，絕對有參考價值，例如近排經常見有大行同基金大手買貨嘅中國七星（245）同亨泰（197），股價就升到你唔信。
又例如上星期哈動（1133）披露有3個大芬以10蚊高位接咗配股嘅貨，股價第2日就有反應。最近一個例子，係香港建設（190）上周五股價急升8.6%，報1.63元，破頂創近幾年新高。
該公司上星期披露獲大股東兼行政總裁於本月14日增持270萬股，每股作價1.481元，另獲PentaInvestment於2月13日增持香港建設3820萬股，每股作價1.40元。
呢間基金增持股份唔算特別奇怪，奇就奇在港建於12日向6名獨立投資者配售5.88億股新股，另向Penta配售1.42億股新股，每股作價1.37元。剛接完億幾貨，第2日即喺市場以1.4元掃入38球幾貨，莫非Penta真係咁求貨若渴？
寶利福再添一品牌
前稱衞科創業嘅寶利福（8172）兩個星期前停牌，涉須予披露交易，上周五發咗份通告，與珠寶設計師翁狄森組合營，從事具生活品味之消費產品業務。
合資公司除會聘用翁狄森為首席設計師，並於4年內向翁狄森支付不少於300萬及不多於750萬元獲利金額，從而可以代理現時由翁狄森經營的「LifeofCircle」品牌在全球的5年分銷權，意味集團以優惠條款添此品牌。
呢隻市值只得4300萬元嘅創業板股，因轉型後在高檔女裝零售、內地發展及新品牌發展潛力而獲遠東科技（036）睇中入股，且看今日復牌表現如何。