上星期唔少球隊踢完足協盃返嚟，喺聯賽表現走晒樣，今個周中同樣有歐聯，大家不妨留意呢啲球隊對家，或者有利可圖。
英超護級戰查爾頓鬥韋斯咸，兩隊近期狀態都係麻麻。比較起嚟，查爾頓略為好少少，對住曼聯同車仔整體仍踢得唔錯，輸波只係限於實力問題啫！韋斯咸連續9場未發過市，喺主場對包尾嘅屈福特贏唔到不特止，仲要輸埋波！佢哋今季作客奇差，搵場勝仗都無，係英超作客成績最差嗰隊。雖則查爾頓今季主場都唔穩陣，只係贏過4場，但往績同狀態仍可秤高一線，穩陣揀讓球上盤。
講開主場成績勁，今季德甲最勁梗要數史浩克04。佢哋係德甲𠵱家唯一主場冇失手嗰隊，加上連續13場不敗，勝出率高達8成，認真可靠。佢呢場對手利華古遜歇冬後表現飄忽，近5場淨係贏過亞琛，仲場場有失波！上周中踢完足協盃後，聯賽主場即輸畀漢諾威，啱啱又同布力般再踢過足協盃，球員體力點都有啲影響。咁環境，寧買當頭起史浩克算數！
阿鵬
有線球彩台主持
電郵：[email protected]