睇完今明兩晚嘅賽程，曼聯作客富咸，我認為呢場要曼聯贏，係本周最穩陣之選！
小弟絕少推介呢啲咁一面倒嘅波，不過，一睇曼聯作客嘅賠率，難得有接近5成回報，諗都唔使諗啦！先睇富咸近況，上場半放棄情況下，足總盃被熱刺大炒4:0，聯賽對保頓又輸埋！其實富咸呢啲中游球隊，爭標無望而又唔使護級，大把本錢踢風流波，心態上無必要同曼聯搏！睇完近況，再睇富咸對曼聯嘅對賽往積，曼聯贏咗9成，首循環富咸仲被曼聯大炒！我有信心入球開大㖭！
至於明晚焦點，當然係聯賽盃車路士對阿仙奴！我當然係支持愛隊車路士啦。舒夫真高已經重拾射門鞋，我對車仔一對前鋒好有信心！另外，阿仙奴近況真係好差，打盃賽成日要玩到重賽兼加時，有大把精力都死啦！車仔以逸待勞，今次仲唔贏硬？
最後，今周最精采賽事，必定係馬體會對皇馬，主隊首循環痛失兩分，今回返到主場，皇馬九死一生，大家等睇入球騷啦！
周鵬
商業1台《球迷集中贏》主持
電郵：[email protected]