美股舊年表現亮麗，踏入中國曆法的豬年，華爾街多數基金經理都睇好後市，認為全年漲幅甚至有機會超越過去10年嘅平均數，其中「醫療保健股」更睇高一線。美國就有股民諗到一條發財妙計，可以喺上晝返工前短炒美股，乘機𢱑銀。
rklamot喺《SuperiorInvestor》討論區話：「大行通常喺早上6點半調高某隻股票嘅投資評級，股民應該喺消息公布後盡快入貨，到9點半開市後即刻沽貨，咁就可以有大約0.5至4%回報，搵快錢認真容易！」
睇大行頭短炒
不過有股民反駁：「開市前嘅成交量通常好細，散戶唔容易入貨或者出貨；加上股票被調高評級後，股價可能已經大升，一般股民好難以靚價位買貨，所以呢類投機活動唔容易食大茶飯。」
rklamot回應：「啲股票喺上晝7點前，應該唔會升好多，所以我會盡量喺7點前入貨，仲會透過納斯達克網站（網址： http://nasdaq.com）昅實個市，吼準個靚價位先至買。」
佢進一步解釋，由於呢段時間嘅成交量小，佢通常最多只會買1000股，但如果日日都有呢種發達機會，密食當三番都幾和味。
不過，美國「股神」畢菲特反對短線交易，認為咁樣只會浪費時間同金錢，仲會好傷身。
佢講過：「如果你冇把握可以長揸10年嘅股票，咁樣就連10分鐘都不必考慮持有。」