【本報訊】16歲香港少女在金沙賭場贏大錢惹爭拗，澳門娛樂有限公司股東、賭王何鴻燊四姨太梁安琪昨日表示，「澳娛咁多年嚟，未試過有咁嘅事件發生，因為未有咁嘅先例，所以冇處理呢啲事嘅經驗。」對於澳門當局將為此修改賭博條例，四太說：「呢度係澳門，澳門政府有任何決定，無論係改、修或者畀指引都好，澳娛都會尊重、遵從。」
謝賢:點都應該畀咗先
現時在澳門銀河華都娛樂場任職公關、人稱四哥的藝人謝賢則認為，「唔係條例寫得唔清楚，係賭場冇執法啫，錯咗就要認錯，人哋㩒到錢就應該畀，㩒到錢係萬中無一嘅，一定要畀啦。至於條例點改係後話啦，點都應該畀咗出嚟先，之後先諮詢政府。」
對於賭場容許未成年少女入場，四哥說：「唔夠18歲嘅點知佢唔入得賭場啫，呢啲牌應該擺喺當眼地方，我從來未見過有呢啲咁嘅牌，我諗就算有都好細，賭場應該派多啲人守門口，睇到唔夠年齡嘅就要查。」問他可曾遇上類似事件，他說：「我嗰度嘅賭廳係細廳，賭百家樂好少咁嘅情況。」
工會:查身份證會趕客
澳門幸運博彩業職工總會理事長鄭康樂對於金沙賭場需向未成年賭客派發獎金，擔心鼓勵其他未成年人士偷入賭場賭博。鄭認為政府應督促每間賭場，嚴格執行檢查賭客的年齡：「賭場競爭激烈，要全部賭場都咁做先至得，唔係一間嚴，一間寬，查身份證會變相趕客，啲客走晒去唔查嗰間。」