中國製藥（1093）去年宣布的3季業績好令人失望，但近期股價就有大強勢表現，長假前一支大陽燭抽上去，假後連續3日，股價在高位仍有好強承接力，就以噚日為例，一度跟大市跌勢而低見1.41元，但可以抽番上1.49元收市，仲逆市而上升2仙，個勢好強，後市應會再大升。
由去年4月開始，中國製藥走勢形成一個大圓底，近日升破1.43元的頂部阻力，且有超大成交（3260多萬股）支持，現時正進行後抽整固，再破位而上，上升目標指向2.10元。
走勢超靚，但業績就不濟，06年（12月年結）首3季盈利1090萬元，同比大跌91.5%，由於上半年已賺1664萬元，即第3季已有虧損574萬元。公司有4大業務，包括生產青霉素系列、頭孢菌素系列、維生素C系列及成藥，其中以青霉素的表現最突出，頭孢菌素同維生素C則虧蝕，成藥則越賺越少。去年第4季料仍有虧損，但全年相信不會見紅。
受惠於醫改政策
業績唔掂，但股價呈強，不會無因。消息指中國醫療體制改革同加強藥品生產監控兩大政策，對現有的大型及具有完善規範的藥廠有利，中藥會係受惠者。
今年係中國醫療體制改革開局之年，醫改方案有望在兩會期間出台，長遠對醫藥行業發展有利。另外，國家藥監局為規範現有良莠不齊的情況，正草擬有關藥品生產監控守則，規定所有行業參與者，一定要同時擁有原料及藥品生產設施，才可進行藥品生產，有關守則預計今年底落實，屆時「缺一」的藥廠，將面臨關門或倒閉，估計未來兩年會有5成藥廠被淘汰。
隨着行業購併加快，藥業前景可看好，特別係中藥呢類大藥廠更見優勢，投資者買前景，唔排除中藥已度過低潮，見底回升。03年最好景之時（維他素C價格大升），集團曾大賺逾5億元，每股盈利33仙，現時行業前景有改善，不難會出現另一個機會，帶領公司邁上另一個高峯。