豬年股市，連升兩日，噚日又進賬157點，高收20809，今日若再升，港股就有機會衝破上月24日收市的20821，再創新高。
基金股繼續發揮威力，噚日推介嘅中交（1800），收9.86元，升0.26元，升幅2.7%，睇個樣似慢火煎魚，其實大戶同基金仲收緊貨，噚日8700多萬股成交，總值8.5億元，就睇到佢哋買得幾急，一收夠貨，唔使講，爆升在望。
另外，前日推介嘅馬鋼（323），噚日最低回到5.22元，但上番5.35元收，升2仙，有咁嘅勢，唔簡單，睇定可以再加注。
馬鋼成個小圓底兜上嚟，噚日回一回，個勢仲正，極其量會唞多一兩日，再上就會坐六望七。
今日再接再厲，推介隻股價有好大機會倍升嘅天津創業環保（1065）。津保呢一輪由2.8元起步，噚日高收3.46元，累積升幅已唔細，但要知道，個勢咁勁，主要係基金大手吸納所致，呢個位仲買得咁「行」，睇幾多？起碼都5成到1個開。
今年熱炒嘅概念股，環保同水務係首選，講到呢瓣，津保真係夠晒照，本身現時擁有11個污水處理項目，其中4個在天津，每日處理污水能力達300萬噸，在內地水業市場排第2位，相信好快就可以企上榜首位置。
有望晉身水業龍頭
津保母公司係天津市政府，中國大力推行水務改革，落實污水處理政策，天津係全國最缺水城市之一，且污水情況亦係最嚴重，津保真係食正條「水」，唔單止可以大展鴻圖，仲可以10年、20年咁有排做。
津保在天津打穩根基，去年已進軍杭州，實行面向全國，幾時晉身成為水業龍頭，相信公司管理層同基金都心中有數，時機一成熟，就會發動升勢，翻一番亦等閒。
06年（12月結），估計津保盈利2.1億元，PE22倍。07年開始進入黃金收成期，保守估計盈利可再增40%，預測PE更只係15.7倍，與國際同業的25至30倍比較，實在好吸引，現水平上車，等年底好收成。