新春佳節，唔少藝人出埠登台𢱑銀，好似孖仔組合Soler同海俊傑都先後去咗澳門金沙賭場嘅酒吧表演。估唔到喺澳門出世嘅型男孖仔，風頭竟然會輸畀亞視藝員海俊傑，大孖Julio仲向觀眾擲水樽㖭！
落台道歉
噚日有人報料，話Soler喺大前晚（年初三）10點演出，當時大概有200人捧場，迫爆酒吧。雖然賭場禁止攝錄，但一名內地男子竟然拎起部DV拍低Soler嘅演出片段，結果俾唱緊歌嘅大孖Julio發現。當時Julio行去台邊，執起一支蒸餾水就掟向嗰名男子身上。
報料者話：「當時個男人俾人成支水飛埋嚟，即刻走咗，Soler唱完首歌之後，話要同對方講聲唔好意思，跟住就落咗台搵佢道歉。」Julio向人掟水，點講都係唔啱，加上佢同細孖Dino極少講嘢，成晚唱埋啲冷門英文歌，所以現場反應麻麻，仲有人「放蚊」㖭。
師奶勁冧
報料者仲話，前晚喺同一個場表演嘅海俊傑就識撈得多，佢分兩段時間出場，頭段7點左右開騷，當時得12個客，冷清到暈，但唱10點嗰場就爆晒，海俊傑仲賣口乖話：「希望豬年個個好似豬咁，發過豬頭，豬籠入水啦！」台下成班師奶fans興奮得齊齊尖叫，之後海俊傑又大派自己嘅相片，仲話：「呢張係多用途相，可以當牆紙黐同當杯墊，但千祈唔好打小人喎！」
當晚海俊傑大唱譚詠麟同張國榮嘅金曲，仲落埋台同師奶握手，好識搞氣氛，班觀眾自然大叫安歌。所以話呢，永遠都係老薑辣㗎。
