食肆禁煙之後，有人歡喜有人愁，一啲酒吧申請到兩年延期，自然開心到極，又有一啲位於戶外嘅酒吧，生意更加好到冇得彈，前星期有兩晚去銅鑼灣西苑食晚飯，飯後行經附近一間露天酒吧，嘩，戶外座無虛席，煙塵滿天，室內有一間唔同名嘅酒吧，竟然又係煙霧迷濛。此酒吧有一特色，就係花生殼滿地都係，人客一啖酒，一啖煙，剝一粒花生，花生殼隨手擲在地上，認真無拘無束。寫「波蘿油」而出名嘅食家梁喺佢專欄話過，隨地擲花生乃係一種享受，叫呢間酒吧唔好改變此「良好習慣」！
後來見到成日蒲蘭桂坊一帶嘅年輕IT專家小肥張，小肥張話酒吧申請「禁煙延期」之得與唔得，與食肆名字好有關係，譬如一間叫做HKBrewery，顧名思義就係賣酒地方，申請得咗，一間叫做X'sDiner，食環署可能覺得Diner噃，冇得傾，唔批你；又有一間叫做BDRestaurant&Bar，因名牌上餐廳行前，既然係餐廳，就唔可以延期啦。假如名稱係XXBar&Restaurant，咁又點呢？申請OK囉。
小肥張話喺安蘭街街尾，新世界大廈停車場門外有一間好細嘅餐廳仔，內可吸煙，因為佢係攞酒吧牌嘅，故此生意不俗，富豪太子Ｃ就經常在此，只要見到酒吧門外有保鑣站崗，就知道太子Ｃ喺裏面。上次咪講過左丁山帶肥仔孫到新世界停車場外食煙囉，呢日行過，又見到財務專家Ｌ企喺度食煙，問佢點解唔行入去酒吧，財務Ｌ話：「企三四分鐘啫，食口煙唔使畀多幾十皮飲杯嘢呀嗎。現在我哋成為被劏對象。呢度有間大廈嘅三樓全層，裝修成為雪茄吧，以私人會所經營，入會費收五千，其門如市。食煙搵地方，先畀五千蚊入會費？高級得滯喎，我企街算嘞！」通街有人食煙，唔怪得肥仔Ｋ回港過年，走咗去旺角一晚，返到屋企就沾上成身煙味，俾媽咪喝打，要佢立即沖涼換衫。以前在室內吸二手煙，猶可走避，現在喺室外吸二手煙避無可避，左丁山惟有不在街上久留！