新年天氣熱到爆，新聞離不開全球氣溫上升。政府努力鼓吹的環保健康意識更顯關注，減少廢氣、多做運動的生活模式可算是大勢所趨。踩單車絕對是年輕人的首選推介，多以兩個轆代步，既健康又環保，亦是不少潮人玩意。為吸引更多人投入單車玩意，單車設計越趨方便輕身。這架全球最輕的摺合式單車只有5.6公斤，今日就搵嚟單車專家/老細（兼前LMF成員）老占Jimmy測試呢架新玩具A-Bike又有幾好玩！
記者：許維雅
攝影：陳偉強
全球最細十秒開合
由英國直接入口的A-Bike是英國著名發明家SirCliveSinclair及特嘉公司共同發明的最新產品，係全球最輕最細的摺合式單車。利用超輕量合金製作的A-Bike，車身只有5.6公斤重，再配合精確式的摺合設計，單車摺合後只有67×30×16厘米，大概比你的相機腳架大少少啦。摺車的開合工序步驟往往十分繁複，但只要熟習，摺合時間只需10秒鐘！
老占測試有讚有彈
A-Bike外形吸引，但單車性能有幾好、開合步驟是否繁複等等，今日就搵Jimmy嚟，一次過話你知！
讚
1.革命性波箱設計夠亁淨
一般單車都以鏈餅推動，A-Bike革命性地以仿波箱齒輪設計，「無論踩單車、開合都唔會俾單車油揩污糟！」
2.上斜夠力
阿占亦有同類摺車HandyBike，每當上斜都十分辛苦。但A-Bike以雙齒輪推動，扭力較鏈餅強，佢話：「上斜比想像中容易，十分夠力。」
3.開合夠簡單
老占第一次嘗試打開單車，打開都係用咗1分25秒。只要略懂竅門，過程其實十分簡單。
4.Seat位幾舒服
「雖然Seat位細細，但幾舒服，以摺車來講算好踩。」
5.樹脂膠夠輕身
輕身合金配合ABS樹脂物料，車身十分輕。加上ABS樹脂的耐衝擊力頗強，所以幾耐用。
彈
1.新手難操控
摺車一向弊病是操控較難，因為結構比普通單車鬆散，配件細難操控。
2.不能快亦不能慢
車轆太細頗難平衡，所以車速不能太慢，又由於車身結構比較不穩，所以一加速或入彎就會飄。
3.只適合短距離
車轆細，令踩單車的頻率更密，所以只適合短距離代步。老占更話：「我老友MC仁試過踩摺合式單車HandyBike跟隊由旺角踩去美孚，結果大叫痛苦！」
4.花式、改裝免問
摺車只可以純代步用途，花式免問。加上A-Bike開合設計十分準確，一但改車，未必能保持原有開摺效果。
5.難維修
由於配件太細，有問題時，一般單車舖都好難找到配件維修。而革命性的雙齒輪推動設計，未必有單車師傅識得維修。
店舖查詢：JCShop（31022783）
銅鑼灣時代廣場9樓919號舖
單車迷即試！
經做文職的阿Joe及13歲的阿庭試車後，發覺踩A-Bike亦並非太難踩，大人細路都啱。
Joe
「我有踩MountainBike，A-Bike比想像中好踩，喺加速時有啲唔穩。外形幾靚仔，價錢唔算貴，可以考慮。」
阿庭
「呢架單車好有型，個轆細細好得意，但踩過後發覺有啲難控制，感覺有啲飄，我未必會買。」
深圳A貨1500人民幣有交易
A-Bike一推出，不少單車發燒友的反應都十分熱烈。在香港討論區內，更有網友收購A-Bike，不少有留意A-Bike的人都有提供意見。想買平A-Bike，可以返深圳試吓，同廠出產的內銷版本叫N-Bike，價錢大約1,500人民幣左右，當然QC品質無得比啦。網友當然對價錢平一大截的大陸版大感興趣，有人更話旺角都有大陸平價水貨版賣，不過，賣平版的確實地點就未有提供，想買平貨就要自己行多兩步摷摷。
http://www7.discuss.com.hk/viewthread.php?tid=2921423&extra=page%3D7&page=1
同場加映！花式迷創全球首個華人單車品牌
專為華人而設的花式單車品牌YellowBike，品牌取名全因黃皮膚。原來一般花式單車都由台灣製造，美國入口，價錢較貴之餘，亦是為美國人的身形而設。本地單車忠堅分子老占就為華人度身訂做屬於自己的品牌，車架Size會較短，較適合亞洲人。所有單車會按客人要求的顏色、配件製造，所以價錢亦有所不同。YellowBike與生產多個美國牌子的台灣著名大廠合作，單車直接由台灣運港，相比美國車平好多。此外，YellowBike十分輕身，平均每架25磅，令表演花式更靈活。
店舖查詢：DJBMX（35792920）
油麻地德昌街20號地下