所謂「有競爭有選擇」特首選舉開始進入尾聲，有權、有勢、有票嗰800位選委，差唔多已有邊歸邊；咁一介平民無權無票又唔使嗌口號（因為嗌都無用），惟有喺網上玩吓「小圈子」投票，分析吓究竟煲呔同袋巾邊個做特首會對港股有利！
如果袋巾梁爆冷，港股會點？February2話：「梁生雖然有心，但有無咁嘅料先？始終佢唔係內行……」kojc999：「Mr.Leung當選，香港冇運行，唔係話佢唔好，始終現實係香港好難獨善其身，無中央支持，香港會……」我叫豬豬就話：「梁家傑（當選）的話，因前景未明，股市實死！」
阿爺唔「照」講乜都假
綜合大家意見，阿爺係唔會「照」袋巾嘅，學ShaLaLa話齋：「總之如果泛民主派是但一個做特首，香港啲儲備3年內就用晒，5年香港就破產！」
咁煲呔連任又點呢？小小野人話：「曾生有機會，會有人托一托個市……」jeffrey088就力撐：「話晒都做咗政府工幾十年，熟悉政府運作。」外星使者仲「大」佢話：「梁袋巾未試過同索羅斯過招，點做特首呀！真係條袋巾大晒咩。」
查實，呢個「小圈子」選舉絕大部份人會揀煲呔、捨袋巾？只係因為大家無得揀，加埋煲呔話晒真係有過打大鱷經驗，大家又點會揀袋巾呢！