花旗嗰邊個市好似冇乜方向感，只係靠唔同嘅零碎消息炒炒吓，前晚道指又跌50幾點收市，雖然納指上升，但係整體氣氛麻麻。
花旗唔掂，港股都唔掂，恒指碌番落20800樓下，唔見咗成百點，不過已算硬淨，因為上晝跌過兩百幾點，成交仲係好奀，冇乜大變。
早排班淡友唱資金外流，係唔係就唔知，不過，睇番大市嘅成交同期指未平倉合約數目，個市少咗資金炒作就好明顯，期指係大戶對撼嘅大市場，未平倉合約縮咗咁多，都反映咗一啲嘢，起碼對沖嘅需要都細咗，現貨市場（包埋窩輪）嘅活動自然會少咗。
下禮拜一A股開工大吉，個紅盤會點開？梗係望佢大升，帶起港股嘅氣氛，不過，淡友梗係唔係咁諗，放假前人行話加存款儲備金，銀行股會唔會畀人插，好快就知，不過，新年紅盤，A股應該都係炒上去嘅機會大好多。
個市插落嚟，仲係靠條10日線頂住，滙控（005）係咁俾人質，又跌6個價位，睇怕好快就會下試250日線，守唔守得住，就要睇外圍股市，不過，下禮拜二期指結算，淡友應該會繼續質住隻滙控，短期想反彈應該就好難嘞。
滙控P輪2256：滙控昨收138.20元，期指結算前後有機會試穿250日線，下試135元，穿咗呢個位，可能要試130元，可以吼吓滙控P輪2256。
2256昨收56仙，槓桿率24.7倍（有效17.6倍），對沖值0.58，正股下試135元，2256應該唔會低過76仙，正股下試130元，隻輪會升至1.15元樓上，呢個時候買有值博率，正股升破140元止蝕。