大家都知道，孫柏文喺《金手指》裏面，日日都叫大家買白銀嘅時候，一定要買實貨白銀。今日，高明輝兄話有感而發，話要警告大家買嘢一定要買實貨，有見及此，今日我就同大家分享高明輝兄嘅文章。
帝國超群紙西餅失效
啱啱過咗嘅農曆年假，我哋特區有一班人，深深咁體會到中央銀行濫發鈔票，令到紙幣本身唔值錢嘅禍害，大家可能會問：「你講緊邊個國家嘅貨幣？」賣個關子先，呢個「國家」，所用嘅「貨幣」，唔係fiatmoney，亦都唔係同美金掛鈎，而係同過年食品年糕掛鈎，講到咁白，大家都應該知道，呢個「國家」，國號叫美心Maxim's。
就喺過年前幾日，美心發行嘅「紙年糕」paperricecake，喺年廿九、三十俾人大量「行使」。作為年糕大淡友嘅美心，俾人「夾倉」，實貨年糕physicalricecake擠提繼而短缺，出現咗經濟學成日都會講嘅「太多糕券追逐太少年糕」現象。
美心當然有「財金官員」即時走出嚟解圍，宣布「紙年糕」同實貨年糕脫鈎，並即刻用年糕券嘅票面值，去鈎其他一籃子貨品，例如西餅、餐券，或者XO醬，大部份持有美心年糕券嘅人梗係唔制，除咗係因為過年一糕值千金、市場瘋狂追捧吸納之外，更加因為佢買嘅「紙年糕」原先獲承諾會兌換番年糕，情況就好似我哋嘅聯系滙率機制一樣，原先講明你拎$7.8去銀行，理論上就可以換番1蚊美元，但係如果任志剛聽日走出嚟話，佢冇晒美金貨，不過𠵱家你拎$7.8嚟，可以換番一罐XO醬，特區上下又有幾多人制呢？不過深圳特區就唔知，因為有個經常話貨幣要鈎一籃子貨物嘅張五常教授。
其實「紙餅券」出現問題都唔係第一次，喺好耐之前，一個好出名嘅帝國超群（1966），版圖一度遍及台灣、美國、加拿大及中國，不過最終都係亡國，所發行嘅「紙西餅」統統宣布無效。該國發出嘅貨幣唔再受到該國執政團體承認，情況就好似當年日本皇軍嘅「大東亞共榮圈」，戰敗投降之後，所發行嘅日本皇軍軍票，變晒廢紙，今日就算你揸住超群餅券去搵李曾超群，佢都會好似日本政府咁，唔會嘔番十二件餅畀你。
大國聖安娜力保不失
至於另一個整餅界大國聖安娜（1972），雖然一直好努力咁做好呢件餅，充實儲備，但係都難逃央行濫發餅券、遇上信心危機嘅問題。喺九十年代，聖安娜出現過「太多餅券追逐太少西餅」現象，差啲俾好友夾死，好彩嘅係，佢哋有足夠嘅西餅儲備，雖然一度出現擠提，市面上有大量「未平倉合約」，但係好彩，最後都成功保住一張餅券兌十二件西餅嘅心理關口，力保不失，但係好友都要抹幾把汗，因為當年排隊換西餅的確搞到佢哋身水身汗。
嚟緊嘅一年，相信會有唔少餅行，要你買紙糕、紙月餅等等，為咗對抗紙幣狂魔，記住，要買實貨。千祈唔好盲目相信餅行拋空出售紙餅券嘅甜言蜜語，例如有九八折，或被恐嚇「唔買紙貨就會冇貨」，因為餅行一旦濫發糕券、餅券，損失嘅只會係你嘅本，而最後你都係收唔到貨。
所以最後，大家要跟住我，年糕戰隊隊長高明輝，去對抗紙券狂魔，大家要緊記，買年糕，最緊要買實貨年糕。
金手指網誌： http://phatdat.blogspot.com