滙豐銀行失驚無神玩按揭減息，唔通樓市就快有得炒？星俠並不看好樓市，事實擺在眼前，港股炒了幾年，恒指都幾乎衝破21000點，各類物業價格升幅卻有限，依然死氣沉沉，雖然有物業代理認為最近不少人過年收花紅收到手軟，該批人不排除將這筆額外之財投入樓市，從而掀起炒風。
星俠卻不認同，若收到大額花紅寧願用作抽新股喇！好似大手申購滙源果汁（1886），股價首日掛牌就升破10元，真係易過借火，試問市場上仲有乜比得上此種回報快又妥的投資？投資宜捨難取易，一比之下立竿見影，散戶不如專注炒股好過。
可中線持有
炒地產股，回報亦比炒樓化算。有些股份除本業以外，又擁有房地產項目，分拆後股份價值自然水漲船高。剛配股的路勁基建（1098）就夥拍母公司惠記（610），透過認購內地房地產公司「順馳」拓展物業發展，管理層曾透露有意將順馳分拆上市，據悉其所屬的幾個地產項目已進入售樓期。
若論兩股只選其一，路勁已配股，惠記比較之下似乎就簡單得多，因惠記收入來源單一來自路勁權益，作為控股公司，一般都計入折讓，過去幾年惠記股價平均折讓逾三成；該股剛升破52周高位報3.20元，仍屬落後分子，惟成交量一般，持中線比較適合。