《料理媽媽》雖然移稙自NDS，不過憑住Wii嘅體感操作，所以一般玩家都當佢新Game咁玩，而對佢有興趣原來唔只女機迷，問過Game舖，原來好多男機迷都入咗貨，有啲就話買畀老婆女朋友玩，不過今時今日，男人入廚又有何不可？不過先喺Wii內苦練一番先去獻技比較好。
《MonsterHunterPortable》全場缺貨
估唔到已經喺PSP上出到第二代嘅《MonsterHunterPortable》，個勢咁勁，行落Game舖，十個有八個機迷都係問「有無《MonsterHunterPortable》賣？」，而今次《MonsterHunterPortable2nd》雖然係由Capcom自己做番代理，不過場中就明顯唔夠貨，通常現貨都係有機迷預先訂咗，而報價一般都係$288左右。
美版開始之Wii
買得Wii，自然會買多幾個手掣，可以同班Friends玩得開心啲，而《開始之Wii》，除咗包括9個小遊戲外，更附有一個手掣，所以成為唔少人出機必買遊戲，不過因為之前只有日版，最近美版《開始之Wii》亦到貨，最大分別係遊戲變成英文版，各位美版機主，想買多個手掣不妨諗諗佢。
Wii色差線校靚色
雖然話Wii係賣操作、玩體感，不過愛美係人嘅天性，當然想個畫面靚！唔計換電視嘅話，最簡單方法係換一條色差線。原裝任記出品色差線，一般被水貨佬炒到二、三百，可以買到隻遊戲，想慳啲可以選擇其他牌子色差線，一百有找。親身上陣試用經驗，同隨機AV線比較，主要係Sharp咗同光咗，好似字體就明顯清楚好多。
記者、攝影：許福合
查詢：I-Gamer（27253338）
