最愛拖住外籍老公出入嘅國產靚太「酸梅」，上年俾人揭發佢有古稀有錢佬照顧，近幾個月先變得低調。話說酸梅初登Ball場時，人又性感，講嘢又大膽，好受歡迎，出席活動仲會自掏腰包買嘢幫襯，所以人人爭住請佢。試過有次公關請酸梅出席珍珠活動，佢好識做咁喺場內左試右試，仲喺大班記者面前買咗價值$7,000至$8,000嘅珍珠頸鏈，臨埋單，佢就不停講價，簽完卡冇耐，公關又好開心咁通知傳媒，話酸梅買咗全店得一條、價值20幾萬嘅珍珠鏈，人人即時大讚佢闊綽兼有米。點知間舖第二日將條獨一無二嘅鏈掛番出嚟，仲掛足一個禮拜，答案好明顯，就係酸梅根本冇買到，純粹得把口講囉。
撰文：阿蘇
此欄逢星期一至六刊出