溫拿樂隊近日喺紅館舉行演唱會，噚日咁啱又係阿B鍾鎮濤嘅54歲生日，所以譚詠麟（阿倫）佢哋幾個，就專登提早喺紅館為阿B舉行神秘生日會，而阿B身邊四個重要女性都有到，包括女友范姜、阿B媽媽同兩個B女。
「俾范姜呃咗」
阿B都話今次真係俾所有人呃到，問到覺唔覺得驚喜，佢話：「今次真係俾范姜呃咗，平時佢都呃唔到我，今日都覺得有少少唔對路，嚟到台前都冇人準備，仲差啲想鬧人。不過今年真係好開心，因為可以成班老友一齊過！」
對於有報道話阿倫將自己一半演唱會酬勞畀阿B，佢就話：「冇咁嘅事，我哋都唔講呢啲，生活足夠就得，唔係發錢寒。」而阿倫亦話：「鍾意點寫就點寫，我哋成班兄弟冇乜所謂，因為今次我哋自己做老闆，演唱會完咗之後先慢慢計，所以自己有幾多酬勞都唔知。」
送按摩椅體貼
問到范姜今日點同阿B慶祝？佢話：「等完晒騷之後會出埠玩吓，我同阿倫佢哋一齊送咗部按摩椅畀佢，等佢做完嘢可以休息吓。」問到佢點解唔做人肉按摩機，范姜就話：「我有時都有幫佢拉吓筋，但按摩我就唔識。」此外，前晚捧場嘅仲有上山詩鈉同佢個囡囡，認真畀面。
