上年新股熱潮，唔少新股都獲超額認購幾百倍，為咗增加中籤機會，散戶出盡奇招，透過多重身份等方法重複入飛。不過，最近警方已經應有關方面要求，插手調查，如果發現當中有不法行為，將會追究刑責。而證監會同聯交所亦研究堵塞有關漏洞，防止日後再有股民出蠱惑。
喺《香港討論區》，雖然有網友話驚俾人查出，唔敢再試重複認購；但大部份網友覺得申請資料全部都係真確，又冇用假資料，而且連律師都話唔會構成詐騙行為，所以會繼續嘗試重複申請。
用真資料唔算詐騙
網友annlylee話：「咁大鑊，我真係唔敢試呀！最多抽唔到就等上市之後買囉。」superpig888亦好同意咁講：「一旦發現用多個戶口認購新股，會被警方追究，確實博唔過。」
不過，亦有唔少網友表示會繼續重複入飛，認為只要冇用虛假資料申請，就算俾人查到，都應該唔會有大問題。superkid就話：「唔係用其他人證件，又唔係用假證，重複認購最多咪取消認購資格，唔使咁驚。」qqstock就笑住講：「之前新股熱潮，已經有好多人試過重複申請，唔通要判晒佢哋入獄咩！」
網友dongdongs相信，用真實資料入兩次飛係無事，查都係查用假資料嗰班散戶啦；而且每次發現重複申請嗰陣，最終都只係退票了事，所以覺得即使警方插手，都係得個「講」字，唔會有實際行動。而mike30就非常贊成警方去徹查，堵塞漏洞，最好檢控一兩個違法人士坐監，否則對奉公守法嘅人唔公平喎。
截至昨日，鴻隆（1383）發現82份重複認購申請，鴻隆主席曾雲樞指是過戶處在處理過程中發現，已即時終止並進行退款手續，仲話公司會對事件保持關注，並向保薦人了解情況；中國地產（1838）亦發現46份重複認購申請。睇嚟，數字會不斷上升。