呢幾年啲改裝公司真係積極咗好多，幾乎每次有新車推出，不出3個月就會有針對該車款嘅改裝Parts登場；情形就好似smartfortwo咁，新一代推出無耐，一直有幫佢哋推出改裝Parts嘅Brabus，已經推出兩個改裝特別版，並將馬力輸出數值，比先前嘅增多30%，並在今年秋季正式登場。
呢兩款分別名為smartfortwoBrabus同smartfortwoBrabusXclusive嘅特別版，將會喺嚟緊3月初舉行嘅日內瓦車展中正式登場；前者嘅最大改動，會係Brabus喺佢用緊嗰台1.0公升直3引擎上動手腳，令馬力及扭力輸出分別增至98匹及140Nm，足足比先前的smartfortwoBrabus，增加多約30%嘅動力輸出，而極速更可高達155km/h！外觀方面，亦加裝有更闊嘅拋外尾沙板、車頭霧燈、跑車排氣系統，而懸掛亦被調低15mm，從而令車子喺彎路上會有更好嘅循迹表現。至於Xclusive版本，則改用Brabus自家嘅3幅式真皮跑車軚環，以及豪華裝飾配件等等，務求予人有豪華十足嘅觀感。
記者：鄭達基