出外旅遊或公幹，難免要搭飛機。乘客逗留喺機艙入面至少都要幾個鐘，最希望機上有啲咩服務呢？
《華爾街日報》網上版最近進行咗一項調查，要求網友就空氣質素、餐飲服務、上網/通訊及娛樂設施、提供更多足部伸展空間、減少噪音及其他等6個範疇投票，選出佢哋認為航空業最需要改善嘅地方。結果顯示，受訪嘅4600人中，六成認為航機最需要改善係提供更多空間畀雙腳伸展，其次係改善空氣質素同娛樂與通訊設施。
網友charles.brenner喺《華爾街日報》網上版嘅討論區度留言話：「經濟艙活動空間狹小，搭長途機好易患上經濟客艙症候群，所以航空公司最好能夠按乘客身形編配座位，等身形較高或肥胖嘅人士坐較寬敞嘅座位，一來可以令佢哋享受舒適嘅旅程，又唔會妨礙到其他人。」
romesh就話：「航機作為大眾主要交通工具之一，航班應該要準時，機上設備亦要齊全，洗手間要清潔亁淨，餐飲質素唔可以太差。」
gracerenshaw認為搭飛機最難忍受係空調：「機上嘅空氣質素認真麻麻，尤其搭長途機嗰陣，啲冷氣凍到死；仲有就係機上嘅清潔同衞生問題都值得注意。」
想快呀坐導彈啦
richgodwin就比較實際，「對乘客嚟講，最好嘅改變莫過於縮短飛行時間。由芝加哥飛去澳洲要成22個鐘，以今時今日嘅科技，唔知可唔可以縮短至6個鐘呢？如果可以縮短飛行時間，乘客唔需要長時間困喺機艙，就唔會再講究要坐咩櫈、食咩餐，反正到時只要坐一段好短嘅時間就落機，就算機上環境幾惡劣，都係忍一陣之嘛，更加唔使驚有機艙症候群啦！」
romesh覺得呢個提議都唔錯，仲好抵死咁話：「想快啲到達海外目的地？無問題！一於叫美國軍方幫手，將你放入導彈裏面咪得囉。去澳洲？使乜22個鐘啫，幾分鐘就到啦！」