故事始於，聯想本月初公布第三季度業績，盈利達5770萬美元，較市場平均預期嘅5600萬美元仲要高，跟住數日股價大升，之後IBM就公布以每股3.2元減持3億股聯想股份。
本來冇乜特別，不過日前一篇嚟自《FinanceAsia》嘅文章就玩踢爆，話聯想第三季業績咁好係另有內情，並唔係因為節省成本有功。
文章引述獲得嘅機密資料顯示，聯想因為承諾未來數年向英特爾採購總值1億美元嘅晶片，減少向英特爾個死對頭AMD採購，所以期內獲得英特爾給予一次過獎勵金額達2200萬美元。但聯想未有將呢個特殊收益喺損益表中反映，只係當收益放入集團總部營業額度，由於冇獨立披露出嚟，令人以為佢哋真係喺節省成本上做得唔錯。
報道話，呢個做法反映聯想去年大幅削減員工同重組北美業務，企圖節省營運開支，增加效益未能成功。睇嚟下次要問番佢哋財務總監馬才女先識解。
[email protected]