清酒配壽司，係一種老套日式食法；襯香檳？味蕾感覺擴張，新派「新」品味；不過最近行九龍城，新開業嘅魚之味有更新想頭！紅酒、白酒「練」埋落飯做壽司；葡萄醉紅、白酒酸香，夾雜陣陣酒氣清芳；一口吃下，酒肉穿腸過，醉醺醺之際真係有種中產、豪邁的快感！
記者：朱崇德
攝影：陳偉強
Model：Carrie
某日落九龍城金寶泰菜朝聖，點知見到隔鄰新開咗間魚之味日本料理，試新嘢心態驅使下走入去趁一趁；問店小二攞餐牌（後知是店長），樣樣三幾十蚊，平似迴轉格局，本來只係平常心；盡叫擺上好酒好菜，點知$50成kg三文魚刀叉上、火燄三文魚嫩到溶喺口，壓尾仲要係我從未食過嘅紅、白酒壽司，份量、質素完全估佢唔到！
醉酒鬧事諗出酒壽司
問大廚阿丁點想出紅白酒做壽司：「紅酒配紅肉、白酒配白肉，好正路啫！」店長阿傑當場踢爆：「其實係醉酒鬧事先真！有次佢飲到醉醺醺，又話嫌支紅酒酸到似飲醋咁；打醉章、紅酒當『壽司醋』練壽司畀人食，點知食完個個都話正喎，紅、白酒壽司咪咁嚟囉！」
解構紅酒壽司飯
好多人都知「紅酒配紅肉、白酒配白肉」！不過最主要的原理，是紅酒中特有的「單寧」，可使紅肉纖維柔化，令肉質口感更細嫩；至於白肉配白酒，主要靠白酒中的酸，可增加口感的清爽活性，而且有如檸檬汁般有去腥作用。
煮酒：紅白酒加壽司醋及糖同煮，點火可增其酒香。
勁撈：加紅酒調味汁後，要將壽司飯打至微微起膠。
練飯：練飯步驟基本同做一般壽司一樣，考師傅手勢。
劍魚腩白酒壽司$28/2件
劍魚腩頗肥美，相對兩嚿紅肉壽司口感較清淡，而且配合白酒壽司飯底好出，價錢唔貴，必試！
法國鵝肝紅酒壽司$68/2件
新鮮法國鵝肝香煎後熱辣辣上碟，紅酒飯底有去油膩作用，令人只食出鵝肝的甘香，口感好舒適。
澳洲和牛紅酒壽司$58/2件
澳洲和牛肥瘦比例好，配紅酒壽司飯的微酸，好能引出肉味；面放的生蒜及葱絲，少少辣香，有提味作用。
鮮帶子白酒壽司$38/2件
鮮帶子開邊後仍有半cm厚度，入口清爽鮮甜，白酒壽司飯底，酸酸帶點酒香，感覺極開胃。
珍寶Size三文魚刺身$50/5件
三文魚係香港人至愛！大廚話呢個刺身係要大家好痛快咁食一餐！每嚿魚生足有手機咁大，一客5嚿，足有800g至900g，平時落超市齋買肉都要近$100，呢度半價$50就食到，擺明係冇錢賺之作。
火燄三文魚壽司$28/2件
好多舖都會做火燄壽司，不過呢度必選最肥美的三文魚腩位：「6kg至7kg一條魚最多開出5客！」撚手之處係會連魚皮一齊燒，皮位燒後特別甘香有魚味，入口滑如凝脂，肉身入口即化。
極上刺身盛$298
呢個極上刺身盛係店內熱賣之作，每客有鮮海膽1板、牡丹蝦3隻、活赤貝1隻、劍魚腩3件、油甘魚3件、帆立貝3件、三文魚3件，玩口感作厚切！
野菜𩶘魚湯稻庭烏冬$68
稻庭烏冬多數做清湯底，有啲為方便用豬骨湯，其實用𩶘魚湯先最能帶出鮮甜香味！」原條𩶘魚熬湯，另切片輕煮8成滑住放麵面，配冬菇及靈芝菇同食，入口香夾滑。
杏仁炸蝦天婦羅$68
手指長的虎蝦，上蛋汁後再平均地撒上杏仁片，然後香炸成天婦羅。功夫處係要炸到面層甘香，蝦肉剛熟，咁入口先會外面香脆，蝦肉爽口！
食神評級
讚：價錢走中、低檔次，魚生質地玩中上級，算係抵食舖。
彈：侍應唔算多，人旺就要稍等！
食物★★★★☆
環境★★★☆☆
服務★★★★☆
價錢★★★★☆
睇路搵食
店舖：魚之味日本料理（23836169）
地址：九龍城衙前塱道19-21號地下A舖
座位：34個
營業時間：
星期一至六（11:30am-3:30pm、5:30pm-11:30pm）
星期日及公眾假期（11:30am-11:30pm）
