新春升市孖住上，昨日港股再升157點，一不離二，二不離三，睇個勢，港股今日仲可以升，一個唔覺意，隨時可以喺期指結算前衝破21000點。
㗎仔個市升破咗18000點，加咗息都升？其實好正路，加息係要防範通脹，經濟去得好，先會有條件加息，唔通等經濟差先加息遏抑通脹？咁到時已經係「滯脹」而唔係通脹嘞。
短線嚟講，市場啲炒家話，日本加息，同歐美嘅利率仲差好遠，利差交易又點會畀佢停，冇大型平倉活動，即係話，利差交易對市場嘅正面影響並冇改變，咁會唔會遲啲影響仲大？咁就要睇幾時再加息，同埋加幾多，不過，㗎仔嗰邊已經講明，只會循序漸進，由於日政府同央行嘅睇法好唔同，所謂「循序漸進」，應咳係好慢嗰隻，相信下次央行議息，會維持利率不變。
昨日班淡友繼續㩒住隻大笨象，好友就一於掃高隻中移動（941），以恒指升跌嚟睇，好友再勝一仗，下個禮拜二就係期指結算，恒指𠵱家逼近21000點，睇嚟好友都唔係善男信女，都係揸Call着數啲。
中煤C輪9106：過年之前年廿九嗰日介紹過隻中煤C輪9090，中煤呢兩日造得幾好，昨日企喺6.89元收市，突破7元上試7.5元嘅時刻好快到嘞，隻9090昨收1.59元，買咗嘅讀者已經有唔錯嘅利潤，隻正股好強勢，9090可以繼續揸。另一隻中煤C輪9106亦可以留意，昨收1.15元，槓桿6倍（有效4.53倍），對沖值0.76，正股升上7.5元，9106應該唔會低過1.6元，正股上試7.8元，隻輪會升到1.85元樓上，呢個價買番啲，正股跌穿6.68元止蝕。