根據資料統計，全亞洲最暢銷兼最受歡迎嘅PSP遊戲，相信非Hit足成年嘅《魔物獵人Portable》（簡稱《MHP2nd》）莫屬，如今廠方食住農曆新年之勢，推出大幅強化嘅第二集，結果反應好到加零一，周圍炒賣到接近四嚿水。唔想做Out咗孤獨精嘅話，仲唔快啲狂煲？遲咗起步點同成班老友一齊開波呀！
撰文：陳福榮
喺大約五個月前嘅東京遊戲展，製作人曾經話過為咗令《MHP2nd》同過往幾集有顯著分別，內容上會着重從未出現過嘅雪山裏面，因此佢無論宣傳抑或主要場景都係白濛濛，營造出一個漫天飄雪嘅雪山打獵環境。結果好多人對呢種設計「直豎拇指」，一來新鮮感多到爆，唔使成日對住以前玩到熟嘅森林同沙漠，二來又可以針對雪地安排啲雪猿甚至雪龍對付玩家，三來角色打扮亦有偏遠鄉間民族色彩，令整體觀感大幅變好。
基本玩法同過往分別唔算好大，都係接受委託去對付班兇猛走獸，或者潛入不毛之地搜索啲珍貴寶物等。想同朋友組隊合作，就要喺村口集合，搵齊其他成員先可以開波，或者直接去獵人公會接Job做，另外今集部份尋寶行動只需2人即可開始，唔使下下4條友出動，總算靈活好多。
擴展村莊似《SimCity》
若撇除斬斬殺殺要素，《MHP2nd》最過癮嘅地方就固然係村莊會逐步成長，但佢並唔係隨時間流逝而自行發展，條件係玩家要達成指定嘅目標。執行每個任務除咗可以拎到金錢同道具外，有時仲會獲得獎分，由此擴張村內設施，如起多間屋或者擴建農地之類，從而衍生其他新任務繼續發展落去，滿足感比起盲目搵怪獸有趣得多。
此外，呢集仲設有專門磨練玩家技術嘅訓練所和鬥技場，透過不同任務去學習各種作戰技巧和新增技能系統，仲有成個畫面咁高嘅巨大魔物戰同埋城砦戰，嗰種以小戰大甚有人類激戰KingKong嘅感覺。
狂加新武器更襟玩
話明係手提版續作，如果新嘢唔夠多就好難令到班老手玩得投入，咁只會影響同破壞佢個金漆招牌。
畫面引擎已經接近家用版第二代，劍光特效同音響做得更加好，當然佢亦都整咗好多種新怪物，唔止勁抽有啲仲好有台型㖭！再者武器方面更大手筆，一口氣追加4款，包括弓、狩獵笛、槍矛和太刀，有人鍾情日本太刀，貪佢範圍大，但我就覺得既似矛又似槍嘅槍矛就好正咯，因為近遠皆適合單刀上陣使用。
另一方面，上集幾引人詬病嘅讀碟時間頗長問題，今次終於都有對策，就係增設名為BGLoad嘅特別功能。話明BG當然係喺大家搏命期間，隨住遊戲進程不經意喺空檔預先讀取資料，大幅減省不必要嘅停頓，然而此舉代價係耗電量激增，所以廠方早就表明除非大家插住火牛玩，否則唔好啓用呢個食電Mode。
首日見街 即斷市被炒起
之前啲風吹到好勁，話《MHP2nd》代理要到初二先至肯派貨，搞到唔少想搵佢嚟衝擊新年假期嘅機迷望到頸都長晒，話晒拜年等車都叫有個伴丫。好彩有關方面體恤民間疾苦，決定提早發售以滿足各位需要，結果喺年廿九晚搞到個個Game場水洩不通，有啲舖頭更喺極短時間內賣咗幾百隻，速度實為歷年賣Game之冠，有機迷更炒Game轉售，$400出貨，認真Hit到暈。
今次行貨除咗一如以往附送超厚特製中文說明書外，仲有精美貓貓螢幕掛繩，唔怪得最近搭地鐵成日見到啲人打PSP打到鬼殺咁嘈，佢哋好多部機都掛晒呢隻貓貓啦。順帶一提，代理仲搞咗個分四期舉行嘅超級大抽獎，將會送出賣成大約兩千蚊嘅超級豪華主機套裝，聽到都心郁郁呢。
機種：PSP
廠商：Capcom
類型：Act
人數：1-4人
價格：$288