周二歐聯里爾對曼聯騷亂後，歐洲足協會喺周五開會研究係咪要重罰。里爾恃住歐洲足協主席柏天尼係自己友，希望推翻傑斯個入波博重賽，真係食咗大頭菜！
曼聯理直氣壯冇有怕
我求大俠覺得成件事理虧在里爾。首先佢哋冇控制入場球迷人數，當曼聯球迷發火，在場警察即刻用催淚彈對付，使唔使咁重手啊？而且傑斯個蠱惑入波係得到球證同意，因此曼聯成件事都理直氣壯。如果傑斯個入波判無效，場波真係重賽，咁歐洲足協真係自找麻煩啦！因為次回合兩周後開波，唔通下個禮拜重賽咩？何況如果場場波都以球證誤判為由而重賽，球員咪唔使唞暑？
最搞笑係里爾會長施多話私下同柏天尼聯絡過，話對方一向幫助小球會，今次實替自己出頭。嘩！你估法國人做咗「一哥」，就可以隻手遮天咩！
講真，里爾係精嘅應該嗱嗱臨息事寧人，專心準備次回合賽事好過，不過𠵱家搞大件事，歐洲足協決定徹查，最後可能搞到呢間法國小球會唔見大筆錢兼將來冇得踢歐洲賽事都唔定，呢啲咪叫偷雞唔到蝕渣米囉！