新正頭，親戚朋友聚首，打番幾圈少不免；呢鋪英超聯雷丁喺初七「人日」，作客到表現麻麻嘅米杜士堡，雷丁受讓平/半，下盤就如揸住一手「九子連環」，收半個盤當「出沖」，等自摸食足全個都得啦！華度
雷丁呢支今季英超「升班馬」，自從去年底聯賽作客僅負曼聯2:3之後，踏入07年至今走勢強勁，各項賽事9戰錄得7勝2和不敗；上周足總盃第5圈秩序，打斷曼聯1.28倍主W，相信唔少球迷都仲記得。
「九子連環」，即係同一瓣13隻牌喺手，例如萬子，無上無碰，「一萬」及「九萬」各3隻，「二萬」至「八萬」各1隻，叫足9飛，任何一隻都食得。周末雷丁要喺米杜士堡地頭搶分，同樣「餐士」面高。
雖然雷丁呢陣子強勢，對手除曼聯外，其他都只係阿士東維拉、愛華頓、韋根及錫菲聯等實力平平分子，但今日接戰嘅米杜士堡，咪又係類似級數嘅對手！
如果又睇「米堡」07年表現，都有賣點㗎，11戰只輸過畀車路士，但其他10場有6場和波，不敗率高，但唔識贏嗰度弊！主場亦已經連和3場，包括足總盃先後打和英甲布里斯托城，以及英冠西布朗，無乜說服力。今仗莊家開盤，「米堡」要讓雷丁平/半，相信只係見佢哋近8場主場錄得4勝4和不敗，呢場都係睇近況可靠啲，一於捧雷丁下盤，望住半個盤等收十足。
冷敲「樸茅」半場勝
至於今期比較好分頭嘅推介，可以試下禮拜日開波嘅另一場英超聯，布力般流浪主場對樸茨茅夫，博「半場主客和」樸茨茅夫「半場勝」。布力般今季主場成績中規中矩，贏輸差唔多；但以半場比數計，所有賽事17戰，只有4場能夠半場帶住領先對手比數返更衣室！雖然半場打和戰果亦常見，但呢場樸茨茅夫「半場勝」有成3.75倍，博得過噃！
投資特攻隊金句
「雖然雷丁呢陣子強勢，對手都只係阿士東維拉、愛華頓、韋根及錫菲聯等實力平平分子，但今日嘅米杜士堡，咪又係類似級數！」