賽馬最近推出咗「Fun組A」，搞到跑馬都可以好似賭波嘅「主客和」咁3揀1，衰在呢門新玩意，暫時仲未可以同其他項目跨項過關。講開玩過關，樓上嘅牽牛最近就同華度呻：「跑馬可以『獨贏』、『位置』齊出擊，1條飛射落去其他場合玩過關，但足智彩如果想『主客和』及『讓球主客和』同捧主隊勝，要射落去其他場合，就要分開幾次落注，認真唔方便！」
「投注區」過關逐注click
牽牛繼續話：「𠵱家賭波唔少人博得某隊開W，都會同時落多注『讓球』及『讓球主客和』，尤其曼聯、車路士、巴塞隆拿呢類強隊，一向孭到飛，足智彩個系統應該搞搞佢啦！」
華度平日小注怡情，都係透過上網呢個途徑居多，的確當你喺同1場入面，揀咗超過1瓣，再同其他場次過關，就要喺「投注區」搞一輪先至做到；又好多時貪過癮睇埋對賽球隊出場陣容，搞到開波前最後一刻至落注，最後總有1條半條飛落唔切，又或者心急起嚟，「刪除」唔切嗰啲已納入過關組合嘅單頭，全部打晒飛！
電話投注就應該比較方便，一口氣噏晒畀馬會投注服務員聽想點過關，等對方整理好再覆述確認，錯漏機會應該可以減到最低。不過，初三嗰日電話投注第1次玩「Fun組A」，對方覆述嗰陣又A又B，突然又覺得有啲亂。文︰華度